AR chêt dan central-ah thlen tum

MZP chuan, tun hnaia Assam Rifles sipaite chêt dan chungchang chu sorkar laipuia Home Minister, Home Secretary leh Eastern Command-a commanding-in-chief Lt.Gen. Anil Chauhan te hnehah an thlen dawn tih an tarlang.

MZP chuan, August 15, 2020 tlai dar 4 vela Sesih, Champhai district-a Mizo hmeichhe pahnih laka Assam Rifles duty-te chêt dan chungchangah, "Mizo nulate sum hmanga lei theih anga ngaiin, sum nena an thlêm hnuah hmeichhe zah­awmna tihbawrhbàn tuma an chêtna chu Mizo hnam hmuhsitna leh diriamnaah kan ngai. Hetianga titu hi hremna na tak pek a nih bakah, Mizoram chhuahsan turin kan phût," an ti.

MZP chuan, School Education department-in sikul ṭhenkhatah online exam kalpui a tum nia an hriat thu sawiin, "Mumal taka zirna kalpui a nih hma leh zir tur chin siam a nih hmaa online exam kalpui tumna awm hi ṭha kan ti lo hle," an ti a; a ṭul anga hmalak an tum thu an sawi.

Mamit district-a Puk­zing ram chhunga Chakma-te khaw dinah Mizoram sorkarin village council hranpa a pe nia sawiin MZP chuan, pawi an tih thu an tarlang a, "Mizoram zímtê hi hnam dang tan phalrai tawh lo tur leh pe tawh lo turin sorkar kan ngen. Khaw din hi kan zir chiang dawn a, thil dik lo leh fello hmuh a nih chuan na takin hma kan la chhunzawm dawn a ni," an ti.