POCSO chungchang inzirtirna buatsaih
Champhai District Child Protection Unit (DCPU) chuan nimin khan an district-a child protection service lama thawkte tan hursualna laka naupang venhimna dan, ‘Protection of Children from Sexual Offences Act, 2012 (POCSO Act, 2012) leh Protection of Children from Sexual Offences Rules, 2020 (POCSO Rules, 2020) chungchang zirna an buatsaih.
CHamphai DCPU chairman Maria CT Zuali, bawrhsap chuan, naupang pawimawhna leh venhim kawnga hnam anga ṭan rual a pawimawh thu sawiin, "Rilru lama piansualna neite'n mi chunga harsatna an thlen thui ṭhin a, hursualna rawngkaia naupangin khuaikhem an tâwk ṭhin hi hnam anga pawi tak a ni. Naupangte'n hleilenna an tawrh palhin, a tuartute'n huaisen taka an puan chhuah theihna tur leh hursualna laka an him theihna turin chhungkuaah uluk taka inzirtir a ngai a ni," a ti.
Maria CT Zuali chuan, home hrang hranga naupang enkawltute chu phûr taka an hna thawk tura fuihin, harsatna tawk naupangte'n belh tlaka an ngai chu chhuang hle turin a chah a; hleilenna tuarte'n huaisen taka an puan chuah theihna tura mi dang zirtir uar turin a chah bawk. Workshop hi Champhai DCPO R Lalrinchhani'n a kaihruai a, assistant public prosecutor Lalchhuansanga Sailo-in 'Hursualna laka naupangte venhimna dan (POCSO Act, 2012 leh POCSO Rules, 2020)’ tih thupui hmangin kal khawmte a zirtir a ni.