Mahni party-ah chian hle tur - Duhoma

ZPM Legislature Party (ZLP) leader Lalduhoma chuan, mahni awmna party policy-ah chian hle tur a nih thu leh, ZPM a sorkar hunah Brig. T Sailo policy - basic need an ngaih pawimawh dawn thu a sawi.

Lalduhoma hian nimina ZPM Tuichang North Block lo (sawhthing hmun) zawhna hun a hmanpuinaah thu sawiin, "Mahni party policy-ah hian chian hle tur a ni. PC party-te kha party policy-ah an chiang ṭhin hle, an member-te'n hydel project leh six basic need kha an sawi thei vek a ni. Sorkarna kan chan hunah chuan Brig. T Sailo policy, kan ram mamawh pui, basic need hi kan ngaih pawimawh ber tur a ni," a ti.

Congress party chu an policy, Rs. 1,00,000 semah an chiang hle a, ZPM pawh an policy-a chiang berte an nih thu sawiin Lalduhoma chuan, "MNF party hi an sorkar flagship program, rua-ah hian an chiang lo hle. An hotupa Chief Minister zahawm tak chauhin a chian avangin amah chauhin a sawi ṭhin a, party member-te leh hruaitute'n sawi ve ngaihna an hre lo," a ti a; rua chin tura an tih, Brandisii chu India sorkar leh National Bamboo Mission-in India rama chin tlak a tih zingah a tel loh thu a sawi.

ZLP Leader chuan, ZPM chu kut hnathawktute chawikân duh leh tum tlattu party a ni tih sawiin, "Sorkarna kan lak hunah chuan kut hnathawktute thawhrimna a thlâwn lo mai ni lo, an thawh rah a hlâwk thei ang bera têltir tum tlattu party kan ni. Sawhthing hi a hralhna awm sa, sorkarin a ngaih pawimawh leh pawimawh loa innghat a ni a, sorkarin a ngaih pawimawh phawt chuan a hralhna a awm," a ti

Lo zawh an buatsaihna hmun hi sawhthing hmun a ni a, ZPM Tuichang North Block lo a ni.