Ruihhlo dona ní hman a ni Rs. 13,99,62,981 hû ruihhlo hâl
Nimin khan International Day Against Drugs Abuse & Illicit Traffiking pualin hun hman a ni a; Excise & Nacotics department (END) chuan nimin khan Bawngkawna Brigade Field-ah hun hmangin, END-in ruihhlo chi hrang hrang an man Rs. 13,99,62,981 hû chu Excise minister R Lalzirliana'n a hâl ral.
R Lalzirliana chuan, theihtawp chhuaha END, Police leh tlawmngai pawlte'n hma an lak laia ruihhlo tam tham tak hâl tur a awm chu ṭan lak a ngaihzia tilangtu a nih thu leh, huaisen taka enforcement-te hnathawh rah chu chhuanawm a tih thu a sawi a; Mizoramah theihtawpa hna thawkte thawh chhuah vanga hausate hmuhsit theih a nih loh thu sawiin, "Ruihhlo aṭanga hausate'n in ṭha pui pui an sa erawh hi chu a chhuahawm loh hle a ni," a ti.
Mizoramah thil ṭha tam tak a luh mek laiin thil ṭha lo tam tak a lut ve zel tih sawiin, Lalzirliana chuan, "Myanmar hawlh thlenga Golden Triangle chhun tur kawngpui laih mekah thil ṭha tam tak lut dawn mah se, thil ṭha lo tam tak pawh a lut dawn a ni," a ti a; thil ṭha lo lut tur chu uluk taka ven a ngaih thu a sawi.
R Lalzirliana chuan, Excise & Nacotics department-a thawktute chu an thawh ṭhat vanga hêkna an tawk a nih a, thiam lohna an nei lo tih hriat chian a nih chuan an hmaah a din zel tur thu a sawi bawk.
Ruihhlo hâl ralna inkhawm hi END commissioner Lalhmunsanga'n a kaihruai a; June 26 , International Day Against Drugs Abuse & Illicit Traffiking chu khawvelin a ngai pawimawh thu sawiin, Pathianni a nih avangin Mizoramah chuan nimin khan hman a nih thu a sawi.
END Commissioner sawi danin, ruihhlo an hâl ral tak chu case fel tawh leh pre-trial disposal tura NDPS Act Section 51(A)-in a phût anga tihchhiat tura tihte leh END-in case 431-a ruihhlo tihral theih leh a neitu awm lote a ni a; Drugs Disposal Committee-in uluk taka a endik hnua hâl ral tura tihte a ni bawk.
Ruihhlo hâlnaah hian parliamentary secretary )END) Lt. Col. ZS Zuala, MLA Chalrosanga Ralte, END secretary Benjamina leh END officer-te an tel.
International Day Against Drugs Abuse & Illicit Traffiking pual hian Social Welfare department bultumin nimin zing dar 9:30 khan Sikulpuikawn leh Chanmari kâwn
aṭangin naupangte'n Vanapa Hall panin kawng an zawh a, Vanapa Hall-ah an lut khawm.
Chanmari kâwn aṭanga kawngzawh turte chu Federation of Indian NGO Drugs Abuse Prevention (FINGODAP) Mizoram Chapter president Lalthanchhunga Ralte-in a vai liam a; Sikulpuikawn aṭanga kawngzawh turte chu Central YMA finance secretary Lalrochuanga Pachuau-in a vai liam.
Vanapa Hall-a inkhawmah kalkhawmte chuan CYMA Finance Secretary kaihhruaiin ruihhlo dona thutiam an chham a; Project Pushpak-a an hotu Col. Vivek Pathak chuan he ni puala placard siam zinga ṭha bera thlante hnenah lawmman a sem a ni.
Ruihhlo hâl ral ralte
Ruihhlo A zat
1. Heroin Kg. 5.653
2. Ganja Kg. 574.821
3. Alprozolam Mûm 2,319
4. Diazepam Mum 120
5. Spasmo Proxyvon Mûm 82,056
6. Methamphetamine Mûm 48,000
7. Pseudoephedrine Mûm 1,52,11,550
8. Parvon Spas Mûm 7,000
9. Nitrazepam Mûm 2,000