Technical rules hman theih hrih loh

Gauhati High Court chuan, The Mizoram (Selection of Candidates for Higher Technical Courses) Rules, 2016 chu hman rih loh turin a dah (stay) nia thu dawn a ni.

He thilah hian All India Chakma Students' Union (AICSU) chuan High Court thulukna chu lawmawm an tih thu an tarlang.

Thu dawn danin, Gauhati High Court hian Mizoram Chakma Students Union (MCSU)-in Mizoram (Selection of Candidates for Higher Technical Courses) Rules, 2016 chungchanga petition an thehluh chu nimin khan a ngaihtuah a; Mizoram (Selection of Candidates for Higher Technical Courses) Rules, 2016 chu hman rih loh turin thupek a tichhuak.

The Mizoram (Selection of Candidates for Higher Technical Courses) Rules, 2016 hi April 20, 2016-ah tihchhuah a ni a; Category-I ah Mizorama Zo hnahthlakte (Zo-ethnic) dah niin, an tan seat 95% zuah a ni a, Category-II ah Zo hnahthlak lote dah niin, an tan seat 4% zuah a ni. Seat 1% chu Mizorama cheng, Central sorkara thawk fate tan dah a ni thung.

AICSU tarlan danin, Higher & Technical Education (HTE) department chuan kum 2015 khan Mizoram (Selection of Candidates for Higher Technical Courses) (Sixth Amendment) Rules, 2015 a lo tichhuak tawh a; chu chu MCSU-te'n duh loin, Gauhati High Court-ah an lo khing tawh a ni. Mahse, Mizoram sorkarin Rules chu July 16, 2015-ah a hnûkkîrin, Chakma-te chu Category-I ah a dah avangin High Court pawhin PIL chu a titawp a ni.

HTE department-in April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-II ah dah an nih avangin MCSU chuan Gauhati High Court-ah PIL an thehlut leh a ni.