Sihhmui-Lengpui Tlawng lei hawn a ni

Sihhmui leh Lengpui inkara Tlawng luia lei (bailey bridge) dawh chu lirthei chi tin kal theihin nimin khan hawn a ni a, lirtheite'n an zawh ṭan nghal.

PWD Highway Division hotute sawi danin, lei innghahna cement block-a chhùnte leh lungremte ṭha taka a châr nan hun tam zawk mamawh ni mah se, Buichali lei lam aṭanga Lengpui panna kawng, BRTF-te'n an enkawl chu June 23 khan leiminin a hnawh avangin Sihhmui lam kawnga lei dawh thar hi lirthei kal theihin hawn a ni. Buichali lam kawng a tlang leh hunah Sihhmui lam kawng hi khâr leh rih a ni ang.

Sihhmui-Lengpui kawnga Tlawng lei dawh thar hi zawh fel a la ni lo a, lei pannel kilhna herh thlawn theih loh tura welding hna chu nimin khan thawh chhunzawm a ni.

Sihhmui Tlawng lei hi Indian Road Congress tehfung angin motor leh a thil phurh rihna pumpui ton 20 chin zo tura ngaih a ni a, ton 20 aia rit, truck ke 10 nei leh a chung lam tan zawh phal a ni dawn lo a; lirthei zawh phal chin aia ritin an zawh loh nan lei tawp ve veah gate siamin duty an dah dawn nia thu dawn a ni.

Tlawng lei dawh chungchangah hian Gauhati High Court, Aizawl Bench-ah public interest litigation (PIL) thehluh a ni a, Court chuan lei dawh hna hi June 15 ah zo turin PWD te a hriattir a ni. Mah se, PWD hotute'n an ngen angin ni 10 chhung hnathawh zawhna atan a pek belh a, hun tiam zawh ni nimin khan lei hi dawh zawh a ni.

Hetihlai hian eptu MLA-te chuan lei hi Ministry of Road Transport and Highways (MoRTH) duh dan anga dawh a nih loh thu an sawi. An sawi danin MoRTH duh dan chuan, lei sir tawnah dâwltu pahnih ve ve bakah, a lai ft. 60 chinah dâwltu pahnih dang dah (triple reinforced) tur a ni. Mahse, tuna lei dawn mekah chuan a sir tawnah dâwltu pahnih dah a ni a, a laiah dah a ni lo.

PWD hotute chuan Vanglaini palai zawhna chhangin, estimate leh technical report a inmil lo tih sawiin, "MoRTH duh dan anga eptu MLA-te'n an sawi anga dawh tur chuan sum an pek nen a inmil lo. Technical error a awm a ni," an ti.

PWD hotute chuan, lei chu ft. 60 chin chiah ni lo, a vaia triple reinforced turin MoRTH-ah ngenna an thlen dawn thu sawiin, "Triple reinforced tur hian cheng vbc. 1.2 a?anga vbc. 1.5 vel a ngai dawn a, tunah hian estimate tur buaipui mek a ni," an ti a, triple reinforced chu MoRTH-in an phal chuan hnathawhna atan kar hnih vel a ngaih tur thu an sawi.