KHAWTHLIR

Peace Rally

January 30-a Remna Ni lo thleng tur pualin tukin zing dar 7 hian Aizawlah Peace Rally neih a ni dawn a, Aizawla YMA branch hrang hrangte an tel dawn. Rally kharna inkhawm chu zing dar 8-ah Lammualah neih a ni ang.

Thisen pe

Lunglei Civil Hospital-ah nimin khan KṬP branch pathumin thisen unit 55 an pe. Bazar Veng branch member mipa 30 leh hmeichhia pakhat, Ramthar branch member mipa 12 leh hmeichhia pali leh, Venglai bial member mipa pasarih leh hmeichhia pakhatin an pe a ni.

MLA-in enfiah

Parliamentary secretary KS Thanga chuan nimin khan a bial chhunga Hlimen, Saikhamakawn leh Melthum local council-te'n PHE, PWD leh P&E department hnuaia harsatna an tawh hrang hrang an thlente a tlawh a, harsatna chinfel dan tur a enfiah.

Phal lo

Assembly House Committee tun hnaia ṭhukhawm chuan, Assembly House a lo him zawk nan leh a zahawm zawk theih nan Assembly Annexe building basement-a exhibition, fair, show neih phal tawh loh ni se,tiin an rêl.

Kawnpui Lei zawh thei chin

Kolasib DC chuan thupek chhuahin, Bairabi khaw chhunga Kawnpui luia lei (bailey bridge) chu metric ton 21 aia rit lirthei zawh a khap. Thupek chhuah a nih chhan hi lei a hlui deuh tawh vanga harsatna a thlen lohna atan a ni.

Anti-Emergency Day

BJP, Mizoram Pradesh chuan nimin khan an party pisaah political session an hmang a, kum 1975-a prime minister Indira Gandhi-i'n national emergency puan duh lohna, Anti-Emergency Day an hmang nghal.