Congress tel ve lohna pawl din a ni - Zoramthanga

MNF president Zoramthanga chuan, Delhi-ah Congress hmunpui kihthluk a nih hnuah hmarchhak bialah Congress kûngpui Assam state-ah pawh kihthlûk an ni tawh nia sawiin, "Hmarchhak aṭang hian Congress hmetmittu tur ‘Congress party tel ve lohna pawl’ din a ni," a ti.

Zoramthanga hian nimin khan Mizo Hnam Rûna inkhawmah thu sawiin, "India hmarchhak biala Congress party hmetmittu tur pawl, North East Democatic Alliance’ (NEDA) dinah chuan hmarchhaka political party lian zual 10 chuang an tel a, converner chu Congress thluak bûr ni ṭhin BJP zawm ta, Himanta Biswas Sarma a ni," a ti a; chu pawlah chuan Mizoram aṭangin MNF chiah tel ve tura sàwm an nih thu a sawi.

MNF President sawi danin, NEDA hian June 20-23, 2016 chhung khan an meeting an nei a, amah pawh a tel ve a; rokhawlhna vangin Sikkim Chief Minister tel thei lo mah se, hmarchhaka chief minister pathum an tel. NEDA hian an constitution tur an duang tawh a, July 13, 2016-ah Guwahati-ah hawn an tum a; MNF party-te pawh a tam thei ang kal turin an inpuahchah a ni.

Zoramthanga chuan, Myan-mar rama sipai sorkar ang maiin Congress party-in India ram chu kum 50 an enkawl chhungin ram hnufual leh mi rethei tamnaah an chhuah nia sawiin, "Ding chhuak leh tawh lo turin Congress par-ty hnawhbo a ngai tak zet a, hmarchhak bialah Manipur leh Megalaya state-a an sorkar pawh tlu mai theiin an buai mek a ni," a ti.

MLA Lalruatkima pawhin thu sawiin, June 22, 2016 khan Congress MLA 11 velin chief minister Lal Thanhawla an lên chilh a, an lungawi lohna leh mangannate leh an policy thar tur chungchangah thu tam tak an thlen niin a sawi a; Ministry sîksâwi leh NEDP chungchangah hming ziah hnanin lehkha an thehlut nia sawiin, "Congress party chhungkua, a rûka buaina chu a puakkeh ni ta berin a ngaih theih," a ti.