NPCDCS hnuaia hmalakna thlirlêt

National Programme for Prevention and Control of Cancer, Diabetes, Cardio-vascular Diseases and Stroke (NPCDCS) chuan nimin khan IPR conference hall-ah review meeting an nei a; kum 2015-16 chhung khan zunthlum mi 9,666 leh blood pressure sang mi 12,904 hmuhchhuah thar a nih thu an tarlang.

Meeting-ah hian Hospital & Medical Education (HME) director Dr K Lalbiakzuala chuan, tunlaiah natna inkai chhâwn theih (communicable disease) a tlem telh telh tih sawiin, "Natna inkai chhawn theih loh (non-communicable disease) hian sân lam a pan nasa a, tunlaia natna kan thihpui tam ber a ni tawh. Chuvang chuan, Mizoram mipuite'n he lamah hian kan pianthar a ṭul hle a ni," a ti.

NCD state nodal officer Dr Eric Zomawia tarlan danin, kum 2015-16 chhung khan damdawi-ina NCD OPD-ah mi 77,827 leh screening camp-ah mi 7,883 an enfiah a; zunthlum mi 9,666 leh BP sang mi 12,904 an hmuchhuak a ni.

Review meeting-ah hian Lunglei, Aizawl, Saiha, Champhai, Mamit leh Kolasib-a NCD Clinic aiawhte'n an district dinhmun leh hmalaknate an sawi a ni.