LPG Control Act zâwm turin hriattir

Aizawl DC Kannan Gopinathan chuan, June 23, 2016-a sorkar official leh LPG distributor-te nena an thurel bawhzuiin nimin khan thupek a chhuah a; LPG Control Order, 2000 chu zâwm vek turin LPG distributor-te leh mipui a hriattir.

Aizawl DC chuan, gas cylinder sem leh hralh chungchang leh gas subsidy kaihhnawiha thil fel lo, mipui tana harsatna thlen theiah mipui awlsam zawk nan LPG Control Order, 2000 chu LPG distributor leh mipuite'n an zawm tlang tur a nih thu a tarlang a, "Mipui awlsam zawk nana system
ṭha kan neih theihna Interactive Voice Response System (IVRS) hi mipuite'n kan la hmelhriat lo hle a, hei hi mahni gas connection neihna agency ṭheuha online booking tih theihna a ni," a ti.

Aizawl DC tarlan danin, online booking ti tur hian https://indane.co.in/sms ivrs.php ah emaw mobile phone no. 9089024365 ah consumer-te a in register a ngai a; mahni distributor phone number leh consumer number register tel tur a ni. In-register hnuah mahni awmhmun aṭangin internet leh phone call/SMS hmangin gas book theih a ni. Online-a gas book-te chu distributor-te'n hun tiam chhungin an pe ngei tur a ni a; distributor-te pawh a theih ang angin home delivery ti tura ruahmanna siam tura ngen an ni.

IVRS hian mipuite a sûr a sa hnuaia gas la tura intlar ngai ṭhin a tihtawp bakah, online registration-ah chuan mi dang chhut chawp ni lo, miin ama nihna (particular) dik thlapa a chhut luh a ngaih avangin subsidy chungchanga pawisa kal sual hrang hrang pawh a sutkian beisei a ni.