Act East Policy chungchang zirho

Mizoram sorkar leh Export-Import (EXIM) Bank ṭangkawp chuan, nimin khan ATI auditorium-ah 'Seminar on Act East Policy - Cluster Based Export Development Strategy' an buatsaih a, chief secretary Lalmalsawma'n a hmanpui.

Chief Secretary chuan, Act East Policy hmangin hmarchhak state-te tan hmasawnna tak tak a thlen a beisei thu a sawi a, "Ram dang nen insumdawn tawnna ṭhang lian zel turin a kaihhnawih industry-te chu a mala kal loin khaikhawm a, cluster based export development strategy siam hi thil ṭha tak a ni," a ti.

Lalmalsawma chuan, thingpui, handloom leh thil dang Mizoram siam chhuahte chu ram danga thawn chhuak thei tura buatsaih te, ramri hrûla insumdawn tawnna chu formal trade-a kalpui vek theih dan ngaihtuahte leh state-in a mamawh leh
ṭangkaipui tur transport, communication, tourism, health, banking leh in-surance-ahte inthuam ṭha tura hmalak a pawimawh thu a sawi.

EXIM Bank chairman Yaduvendra Mathur chuan, "Mizoram sorkarin tih tak zeta Act East Policy a ngaihven leh hamṭhatna awm thei zir chiang tura min sawm hi a lawmawm hle. Mizoram hmasawnna rahbi pawimawh tak paw chhuak tura zir chianna kalpui kan tum," a ti.

Yaduvendra Mathur chuan, sumdawnna bul
ṭan leh kalpui tawhte puih a, hlâwk leh zau zawka an sumdawnna an kalpui a, Asia ram ṭhenawmahte an inzâr pharh theih nana bul ṭansak chu an tum zinga mi a nih thu a sawi a, "Mizoram hi kalpawh harsa tak a nih vanga sumdawnna leh hmasawnna kawng dangah a hnufûm ṭhin anga kan ngaih hi a ni reng dawn lo," a ti a; thil siam chhuahte ram danga thawn chhuak thei turte tana loan leh sum lama puihna dang hrang hrang an pek theih thu a sawi.

EXIM Bank hi sorkar laipui hnuaia awm a ni a, importer leh exporter-te hnenah loan-te pein, ram dang nen insumdawn tawnna kaihhnawih industry-te tihmasawn turin ṭanpuina a pe ṭhin. Ram danga office pariat an neih zingah pakhat chu Myanmar khawpui Yangon-ah a awm a, India ramah chuan hmun 10-ah neiin, hmarchhakah chuan Guwahati-ah office an nei. Sum lama ṭanpuina bakah, publication siam leh training hrang hrang pawh an pe ṭhin a ni.