KHAWTHLIR

Health & Family Welfare department chuan, Covid-19 kaihhnawiha swab sample test man, July 30, 2020-a an bi­thliah tawh chu August 24, Thawhṭanni khan an tidanglam. ICMR-in test ngai a tihte leh frontline worker test turte a thlàwna test an ni ang a, state páwn aṭanga hawte tan chuan RT-PCR-ah Rs. 2,500 leh TrueNat-ah Rs. 1,500 chawi tawh tur a ni a, mahni in test duh tan chuan RT-PCR-ah Rs. 4,500 leh TrueNat-ah Rs. 3,000 chawi a ngai dawn.

Kolasib Venglai Branch YMA-te chuan nimin khan Kolasib District Hospital tan thisen unit 71 an pe a, a petute mipa 55 leh hmeichhia 16 an ni.

Disaster Management & Rehabilitation department chuan district tina bawrhsapte hnenah lehkha an thawn a; DC-te chu an district chhung­a quarantine facility atana hman mek mikhual thlenna hotel hming mipui hriata puangzar turin an ngen.

MHIP General Headquarters chuan nimin khan Tuipuiral Block MHIP hruaitute hnenah tunhnaia lirnghing tuar­tute ṭanpuina atan Rs. 20,000 an hlan.

Aizawl DC chuan thupek chhuahin, ṭhenawm state leh Myanmar ramah vawk hri a lên mek avangin Aizawl district chhungah hmun dang aṭanga vawk leh vawk sa aṭanga thil siam lak luh a khap. Khapna thupek hi thla hnih chhung atan a ni a; AH&Vety department-in phalna a pekte erawh a huam lo.

Aizawl Traffic SP Rodingliana Chawngthu chuan thupek chhuah­in, Chaltlang road-ah retaining wall a chim avangin Chaltlang leh Chanmari inkarah lirthei lian (HMV) leh a laihâwl (MMV)-te (city bus tiam loin) tlân khap a nih thu a puang. Retaining wall chimna lai chu lirthei liante'n an rah nghawr nasat chuan a aia nasaa a min hlauhthawnna avang­in thupek hi siam a ni.

Darlawn khua chu Covid-19 vei an awm avangin Mizoram sorkarin containment zone-ah a puang mek a, mipui chhuahvah theih a ni lo. Hei vang hian an khaw ṭhenawm - Sailutar, Serzawl leh Chhanchhuahna-khawpui khuate chuan nimin khan chawhmeh tur thlai chi hrang hrang ṭhahnem tak a thlàwnin an pe. Darlawn Task Force chairman C Lalrothanga chuan, chawhmeh an dawnte chu an khuaa YMA branch hrang hrangin an sem kual dawn tih a sawi. Darlawn hi containment zone a nih avangin khawlaia chhuak an awm lo a, mamawh neite chuan YMA kaltlangin an mamawh an lei a, duty-ten dawrah an kalsak ṭhin a ni. Darlawnah hian postive contact vangin chhungkaw 76 chu a bika inkhungtir (quarantine) mek an ni.

Nimin khan State Referral Hospital-ah Covid-19 vei mi 17 dah luh an ni a, mipa pakua leh hmeichhia paruat an ni. SRH-ZMC Bulletin tarlan danin, SRH-ah hian Covid-19 vei mi 57 (mipa 43 & hmeichhia 14) an awm mek a; ICU leh SICU-ah pahnih ve ve awmin, a bak zawng Isolation Ward-ah an awm. ICU-a awm pahnihte'n hma an sawn a, ward leh SICU-a awmte'n harsatna lian an nei lo.

Lawngtlai DC Dr Andrew H Vanlal­dika chuan nimin khan a pisa-ah DTO leh Mizoram Maxi Cab Owners' Association (MMCOA), Lawngtlai district hotute a kawm a, hri leng kara sumo service dan tur a sawipui. Meeting chuan August 25 - 29, 2020 chhungin Lawng­tlai aṭanga Aizawl leh Chawngtea sumo-te an service chawlhtir rih an rel a,ṭul bik thila service ngaite chuan MMCOA leh DC pisa aṭangin phalna an la tur a ni.