Bru-te'n Mizoram pâwna awm chungin Mizoram khua leh tui nih an ngen

Ministry of Home Affairs minister Rajnath Singh chuan Inrinni khan Kanchanpur, Tripura a tlawh a; Mizoram Bru Displaced People's Forum (MBDPF) chuan Rajnath Singh-a hnenah hian, Mizorama awm lo pawha Mizoram khua leh tui nih ngenna an thehlut.

Kanchanpur-ah hian Rajnath Singh hnenah MBDPF president Bruno Meshta chuan an thil phût hrang hrang point 10 a lo pe a; an thil phut zingah, Kashmiri Pandit-te dinhmun ang pek a tel. Kashmiri Pandit-te hi India ram hmun hrang hrangah an awm darh a, mahse Jammu & Kashmir khua leh tui nihna an nei a, vote pawh J&K-ah an nei reng a ni.
Rajnath Singh chuan, Bru refugee camp-a awmte Mizorama lak let chungchanga harsatna awmte chu ṭha thei ang bera chinfel a duh tih a sawi a, "Hemi chungchang hi Tripura sorkar ka sawipui tawh a, Mizoram sorkar pawh ka sawipui leh ang," a ti.
Kanchanpur a tlawh hnuah Rajnath Singh hi Tripura khawpui Agartala-ah Tripura chief minister Manik Sarkar nen an inkâwm leh a; Rajnath Singh chuan, Bru refugee camp-a awmte chu Mizorama let vek turin a ngen tih sawiin, "Mi­zorama kîrte chu sorkar laipuiin chawmdawlna leh venhimna a ngaihtuahsak dawn a ni," a ti a, Bru-te pawhin Mizorama lêt an duha a hriat thu a sawi.
Tripura CM leh Home Minister inbiaknaah hian chief minister Lal Thanhawla pawh tel tura tih a ni a, mah se, a tel lo. Lal Thanhawla tel loh chungchangah hian Rajnath Singh chuan, "Programme dang ruahman lâwk a lo neih avangin a rawn tel thei lo. Mahse, Bru-te la let thuai tur leh an himna ngaihtuahsak turin min ngen a ni," a ti.
Kum 2005-a Intensive Roll Revision-a a lan danin, Tri­pura transit camp-ah hian Bru chhungkua 4,730 an awm a; chungte chu Mamit district aṭangin chhungkua 3,833, Kolasib district aṭangin chhungkua 628, Lunglei district aṭangin chhungkua 268 leh Lawngtlai district aṭang­in chhungkaw pakhat an ni.
Tripura transit camp-a Mizoram Bru-te chu May 21, 2010 aṭangin Mizoramah lak let ṭan an ni a, Phase-I Batch 6-na thleng kalpui tawh a ni. June 23, 2014 thleng khan Bru chhungkua 1,237 lak let tawh an ni a, chungte chu puitling 4,665 leh naupang 1,846, an vaiin mi 6,511 an ni.