State páwnah mi 658 zir chhuak tawh

Labour, Employment & Industrial Training department hotute chuan, Skill Development Initia­tive Scheme (SDIS) kal­­tlangin Mizoram páwn­ah Mizo ṭhalai 658-te'n thiamna bik an zir (trai­ning) chhuak tawh a, state chhungah mi 231-in an zir chhuak tawh bawk tih an sawi.

LEIT department hotute sawi danin, SDIS hnuaia ṭhalaite eizawnna atana ṭangkai tur thil zir chhuakte chu sorkar pawmpui vocational trai­ning provider (VTP) aṭanga zir an ni a; tun dinhmunah Mizoram páwnah Mizoram sorkar pawm VTP 30 leh Mizo­ram chhungah 17 a awm a ni.

Mizoram páwna VTP-ah Mizo ṭhalai 658-in an zir chhuah tawh laiin, zir mek 597 an awm a, zir chhuak tawh zinga mi 205 chuan hna an hmu tawh niin LEIT department hotute chuan an sawi. Mizoram chhunga VTP-ah zir chhuak tawh mi 231 an awm laiin, zir mek mi 243 an awm a; Industrial Training Institute (ITI) pathum - Aizawl, Lunglei leh Saiha-a zir chhuak ṭhalai 22-in state páwnah hna an hmu tawh a ni.

LEIT department hotute chuan, state pawn­ah kher ni lo, Mizoram chhunga VTP-ahte course ṭha tak tak zir tur a awm tih an sawi a; chu'ngah chuan ram páwna hna thawkna tlak thiamna a zir theih tih sawiin, Mizo ṭhalaite'n ITI-a zir nachang hria se an duh thu an sawi.

Mizoram sorkar hriat­puia phaia training-te chu an zir zawha hna an thawhnaah Rs. 8,000 aia tlem lo hlawh ngei tur an nih thu an sawi a; chutih rualin, an zir zawh hmain institution-te'n thla hnih/thum an zir hnuah hmun dangah 'on the job training' neiin an tír chhuak ṭhin a, chu chu mi ṭhenkhatin hrethiam loin, hna an hmu ta emaw ti an awm ṭhin thu an sawi bawk.