Champhai MHIP-in CM an chawimawi

Assembly session hnuhnung bera ‘The Mizo Marriage and Divorce Act, 2014’ pass a nih vanga lawmthu sawina atan MHIP sub-headquarters, Champhai chuan Inrinni khan Champhai Venglai community hall-ah chief minister Lal Thanhawla an chawimawi.

Lal Thanhawla chuan, dante chu dik taka hman a nih chuan ram leh hnam chawikangtu pawimawh a ni tih sawiin, "Tuna Mizo inneih leh inṭhen thulha hmeichhiate tana chanvo siam hi hmeichhiate tan mai ni lo, kan zavaia tana hamṭhatna tur leh nakin hun lo kal zel tur thleng kan ṭangkaipui tur a ni," a ti.

Hmeichhiate chu chhungkua, khawtlang leh kohhran thlengin an pawimawh tih sawiin, Chief Minister chuan, "Sorkar programme pawimawh ber NLUP hlawhtlinnaah pawh thui tak hmeichhiate'n mawh an phur a ni," a ti a; MHIP member-te chu sum lak luh mila khawsak thiam turin a chah.

Lal Thanhawla chawimawina inkhawm hi MHIP sub-hqrs. Champhai president VL Rochhari'n a kaihruai a; minister of state Lalrinmawia Ralte, parliamentary secretary TT Zothansanga leh MLA pahnih - R Vanlalvena leh T Sangkunga-te pawh an tel a ni.