Power tariff 6.39%-a tihpun tum a ni

Power & Electricity depart­ment-in kawlphetha hman man tihsan a tum mekna chu tuna bill rate aṭangin 6.39%-in a pung dawn.

P&E-in rate thar an ruahman hi Joint Electricity Regulatory Commission (JERC) for Manipur & Mizoram (JERC)-ah an thlen tawh a, chutih laiin, Central YMA chuan dodalin, JERC chu tariff rate thar pawm lo turin an ngen.

Thu dawn danin, JERC a pian hnuah kum 2010-11 khan power tariff ennawn hmasak berah average tariff chu unit khat man Rs. 3.30 a ni a, kum 2012-13-ah unit khat man chu Rs. 3.68 (11.5%)-ah tihsan a ni. Kum 2014-15-ah unit khat man Rs. 3.90 (6%)-ah tihsan leh a ni a; tuna P&E-in tihsan leh tum, Central YMA-in a dodal mek hi kum 2015-16 atan hman tur niin, average tariff unit khat man chu Rs. 4.16 (6.39%)-ah tihpun rawtna a ni.

CYMA-in JERC a ngennaah chuan kum 2014-15-ah power tariff ennawn a nih tawh avangin ṭul rih loa an hriat thu te, power tariff petition 2015-16 dik leh felfai chu February 6, 2015-ah chauh mipui hriatah tarlan a nih avangin mipui hriat chian an duh loh vanga an ngaih thute an ziak a ni.

Power tariff thar siam chung­changa Vanglaini palai zawhna chhangin, JERC hotute chuan, P&E-in power tariff thar an siam chu an rawtna anga pawm kher tur a ni tihna a ni lo tih an sawi a, "Electric bill dinhmun hi India rama thuneitu sang ber 'Appellate Tribunal for Electricity (APTEL) thupek angin state commission-te hian kum tinin an siam ṭha tur a ni a. Hei vang hian P&E pawhin JERC-ah kum tin tariff siamsak an dil a ngai a ni," an ti.

JERC hotute chuan, rate thar ruahmanah P&E sawifiahna an ngaithla phawt dawn tih an sawi a, "Public hearing-a P&E-in zawhna an chhannate kan ngaithla leh ang a, chumi hnuah JERC-in thuthlukna a siam chauh ang," an ti a; kawlphetha hman man chu phai aṭanga power leina leh electric bungraw siam ṭhat leh enkawlna atana sum ṭul zat en chunga tariff siam a ṭul thu an sawi.

JERC hotute sawi danin, power tariff thar siam dawnah power sector enkawl nana sum hman ngai zat, Aggregate Revenue Requirement (ARR) leh tariff hman laia revenue hmuh zat turte chhûtin, ARR daih hmu turin tariff thar ruahman tur a ni. APTEL hian JERC-te chu December thla chhunga kum thara tariff thar tur dilna an dawn loh chuan, Electricity Act 2003 section 64 leh National Tariff Policy clause 8.1(7)-a sawi angin 'suo-moto' hmangin tariff an siamsak thei a ni.

Electric bill tisang tura P&E rawtnate chu JERC-in consultant a rawih Administative Staff College of India (ASCI), Hyderabad nen an zir chiang a; a ṭul angin P&E lam chu zawhnate an zawt a, mipui ngaihdan an la bawk a, chumi hnuah thutlukna an siam ṭhin.

Electric bill tihsan dan rate (percentage) tlangpui zawhna chhangin JERC hotute chuan, kawlphetha hmangtu hrang hrang - domestic, non-domestic/commercial, industry leh a dangte hman zat tur belhkhawmin bill hlui hmanga revenue sum hmuh theih zat aṭangin bill thar hman huna unit khat man punna percentage chu chhût chhuah a nih thu an sawi a; rate thar 6.39%-a pung tur pawh hi revenue hmuh tur pumpui aṭanga chhût a nih thu an sawi bawk.