Tribal Affairs secretary-in Mizoram a tlawh

Ministry of Tribal Affairs secretary Dr Hrusikesh Panda chuan Inrinni khan zan hnih riak turin Lawngtlai a thleng a, Lawngtlai DC conference hall-ah LADC leh MADC hotute a kâwm.

Dr Hrusikesh Panda chuan LADC leh CADC hotute'n harsatna tawh an sawite chu chak zawk leh awlsam zawka sutkian theih dan tur nia a hriatte a hrilh a, "Hmasawnna hrang hrangte kalpui tur hian sum kan mamawh hmasa ber lo a, a thawktute inpekna leh kan neih ang angte dik tak leh fing taka hman chhuah hi a ṭul zawk a ni," a ti.

CADC area chu ziak leh chhiar thiam tlemna district a ni tih sawiin, Dr Hrusikesh Panda chuan, LADC leh CADC hotute chu ziak leh chhiar thiam an pun theihna atana ruahmanna siam a, an ruahmanna siamte chu a hnena thehlut turin a chah.

Meeting hi Lawngtlai DC J Hmingthanmawia'n a kaihruai a; LADC CEM V Zirsanga leh CADC CEM Lila Buddha Chakma hoin autonomous district council hotute an tel.

Dr Hrusikesh Panda hian Inrinni vek khan NLUP line department hotute a kâwm a; ar, thlai chi, thlai ṭiak leh loneitute'n an mamawh hrang hrang state dang aṭanga châwk luh chawp ngaite chu siam chhuah tum a, mahni intodelh theih dan kawng zawn zel ṭha a tih thu a hrilh.

Tribal Affairs Secretary hian February 13 khan Aizawlah Social Welfare, School Education, Health, Environment & Forest, Home leh Mizoram Scholarship Board hotute a kâwm a; Ministry of Tribal Affairs hmalaknate a sawipui a, department aiawhte chuan harsatna an tawh hrang hrangte an hrilh.

Dr Hrusikesh Panda hian nimin khan Mizoram a chhuahsan a ni.