MNF-in Lalsawta thusawi an chhâng

MNF chuan, Finance minister Lalsawta'n kum 2014-a cheng nuai 342 sênga minister leh parliamentary secretary-te car thar lei a sawifiahnaah, 'Officer-te motor tur a ni a, minister leh parliamentary secretary-te min kian,' tia a sawi chu Congress sorkar sum enkawl mumal lohzia tilangtua an ngaih thu an tarlang.

MNF thuchhuah chuan, CM Lal Than­hawla’n, ‘RBI-a Mizoram sum nei hi chu a senin a kâwk tawh’ tia July 26, 2013-a a sawi hnuah pawh Congress sorkar chu sum inrenchemna lam hawia hmalakna nei duh loah an puh a, "Nawmchenna atan liau liaua hman turin minister leh parliamentary secretary-te motor thar March 29, 2014-ah Treasury-ah challan no. 32642 hmangin tihfel a nih tawh thu SAD-in an sawi daih tawh a ni," an ti.

MNF chuan, minister leh parliamentary secretary-te car leina tur sum Rs. 3,41,50,000 chu department official-te hman tura ruahman a nih thu sorkar file-ah a inziak lo nia sawiin, "Mahni kawl tur motor thar leite hi inhnawn kawi mai mai chi a ni lo. Finance minister hian Mizoram sorkar sum tlakchhiatna vàwrtawp thleng mekah mawhphurtu bulpui ber a nih zia a inpuang lek a ni. Amah ngei hian motor thar leite chu 'Zahawm nana lei kan ni,’ tia a sawite kha chhût let ngam se kan duh," a ti.

MNF tarlan danin, kum 2014-a minister leh parliamentary secretary-te car thar lei chu 36 a ni a, Verna 1.6 VTVT car 18, Bolero 18 leh pick-up pakhat, a vaiin 37 a ni. Verna car chu Rs. 9,60,861 man a ni a, Bolero chu Rs. 7,90,000 leh Rs. 8,20,000 man a ni.