PHE-in kum 2013 & 2014 chhungin Tui connection thar 80,484 an pe

Public Health Engineering (PHE) department chuan tun hnai kum hnih chhungin Aizawl khawpuiah tui connection 80,484 an pek belh tawh a; tui semna atana chawhrualin ni khatah kawlphetha megawatt 3-4 vel an dawng ṭhin.

PHE hotute sawi danin, GAWSS Phase I & II te hian a tira a châwm zat tura an ruahman let hnih a châwm mek a; tunah hian chawhrualin ni khatah 24 MLD an pump mek.

PHE chuan kum 2013 khan tui connection thar 38,569 an pe a, kum 2014-ah 4,1915 an pe leh bawk. Kum 2013 leh 2014-a tui connection an pek thar zat chu 80,484 a ni.

PHE hian Aizawlah tanky lian 54 an nei a, chungah chuan tui litre 34,727,407 dah theih a ni. Tanky lian aṭanga mipui hnena tui an semna pipe (GI Pipe) thui zawng belhkhawm chu km. 182 a ni a; Tuikhuahtlanga zémpui aṭanga zonal tank 54-tea tui an pekna thui zawng chu km. 167 a ni.

PHE hotute chuan, mipuiin rualkhai taka tui an dawn theih nan tui sem apiangin PHE Control Room, Tuikhuahtlang aṭangin an vil reng niin an sawi a; Aizawl veng hrang hrang vil turin section officer 24 an awm tih an sawi.

PHE chuan Tlawng lui tui pump nan leh Tuikhuahtlanga PHE Pump House aṭanga Aizawla tui sem chhuahna atan ni khatah kawlphetha megawatt 3-4 an dawng tlangpui. Chutih laiin, an dawn tura ruahman chu megawatt 7.3 a ni a, an dawn tam berin megawatt 7 an dawng ṭhin.

GAWSS Phase-I ah Tlawng aṭanga tui pump na atan diesel engine pali leh electric motor pali an nei a, ni khatah litre hnuai 70 pump theih tura ruahman a ni. GAWSS Phase-II erawh chuan electric motor pahnih leh diesel engine pahnih an nei a, ni khatah tui litre nuai 130 pump theih a ni.

Phase-I leh Phase-II aṭanga tui an pump zawng zawng aṭangin ni khatah mi pakhat tan tui litre 70 zel pek theih tura ruahman a ni a; mahse kawlphetha awm loh vang leh khawl chhiat cháng a awm vangin duh angin tui an pump thei lo fo niin an sawi.

Thawhṭanni aṭanga Inrinni thleng tui sem a ni a, Pathiannia tui sem a ngaih cháng a awm bawk. PHE hotute sawi danin, Pathiannia tui sem a nih hian tui dawngtu ṭhenkhat chuan tui semte chu in­khawm an duh vanga sem lo tura an duh thu an lo hrilh a, ṭhenkhat chuan an ànkhum hial ṭhin. Pathian­nia tui sem an duh loh chhan hi inkhawm an duh vang a ni tlangpui.