Ram teh hna mi dang pek tum a ni: 'Risk-mual awm chhan sorkar chak loh vang' - Revenue Minister

Land Revenue & Settlement (LRS) minister B Lalchhanzova chuan, rang zawka ram pass siama tihfel a nih theih nan pawn lam mi rawih tel tum a nih thu a sawi a; Mizoramah ram buai a tam chu mipui leh LRS department thiam loh a nih thu leh, 'Risk-mual' awm chhan chu sorkar chak loh vang a nih thu a sawi bawk.

LRS Minister hian nimin khan a pisaah press conference a nei a; ram pass siam chhung rei lutuk tihtawp dan kawng dap mek a nih thu sawiin, "Pass siam chhung a rei chhan hi thawktu indaih loh vang a ni ber a, a buaipui dan process thui vang a ni bawk," a ti a; indaih lohna phuhrûk nan surveyor 15 lak tum a ni a, MPSC-in July 9, 2024-ah advertisement a chhuah thu a sawi.

LSC/pass siam leh a kaih­hnawih thilte chak zawka tih a nih theih nan pawn lam mi rawih tel tum a nih thu sawiin B Lalchhanzova chuan, "Map drawing ti turin páwn lam mi rawih tel tum a ni a, department indaih lohna a chhâwk viau beisei a ni. Empanelled firm ni turin firm 17-in dilna an thehlut a, sorkarin a zir chiang a, a pawm vek tawh. Department pawn lamah licensed surveyor neih a nih theih nan hmalak a ni bawk," a ti.

Zawhna chhangin Minister chuan, Mizoramah ram buai a tam a, LSC inthuah a tam thu a sawi a, "Ram buaiah hian mipui chauh thiam loh a ni lo a, LRS thiam loh pawh a ni. Ram buai awm theite department-in kan lo ngaihthah rei a ni," a ti a; land reform kalpui an tumah LRS department siamṭhat hmasak a ngaih thu a sawi.

Revenue Minister chuan Aizawl khawpui chhung hmun ṭhenkhata 'risk-mual' a awm chungchang zawhna chhángin, "Risk-mual awm chhan hi sorkar chak loh vang a ni. Ka minister chhunga risk-mual a la awm a nih chuan ka thiam loh a ni ang," a ti.

LRS department-a thawkte chu anmahni dawrtute lo dawn­sawn kawngah ṭan la tura an infuih reng thu sawiin Minister chuan, "Sorkar hnathawkin an tih âwm loh tak, sum therhlo beisei ang chi pawh complaint mumal taka a luha, finfiah a nih phawt chuan kan enliam dawn lo," a ti a; ṭawng­kam hawihhâwm hmang zel tura an infuih nasat thu a sawi.

B Lalchhanzova chuan, Aizawl Municipal Corporation (AMC) chhunga house pass dilna form Revenue Minister-a dil kher ngai ṭhin chu January 25, 2024 khan tihtawp tawh a nih thu a sawi a, "Minister-a dil ngai ṭhin chu Director-ah sawn a ni," a ti.

Revenue Minister chuan Progressive Tax an buaipui thu sawiin, "Mi hausa, ram ngah apiangin sorkarah chhiah an pek tam theih nan Progressive Tax kalpui tum a ni a, kalpui dan tur ruahmanna siam mek a ni," a ti a; kalpui dan tur zir chiangtu tur committee din tum mek a nih thu a sawi.

LRS Minister chuan, UDPA department-in Mizoram Urban Area Building Regulation, 2024 a tihchhuah zûlzuiin AMC area-ah LRS department-in in sakna atana him leh him lo te, ram pass inpekna atana him lote an enfiah dawn thu a sawi a, "Joint survey team kan din tawh. Team hian high risk zone leh hazard zone map an siam ang a, enfiah a nih hnuah restricted area kan puang dawn," a ti.

B Lalchhanzova chuan, compensatory afforestation atan hman tur ram eng emaw zat chhinchhiah a ni tawh tih sawiin, "NH-306 leh NH-06 laihna, Sairang Dinthara FCI kudam dinna leh Mualkhanga Gas Bottling Plant zauhna atana ram lakah compensatory afforestation atan ram hectare 332.811-a zau pek a ni tawh," a ti a; compensatory afforestation ram chhinchhiahte chu project hrang hranga ram hman rulhna atan hman theih a nih thu a sawi.

Zawhna chhangin LRS director V Lalduhzuala chuan, Assam Rifles ram luah chhungah mimal ram pass 54 a awm thu a sawi a, "Chung zinga 13 chuan sorkarah an pe lêt tawh a, pek let loh ram pass 41 a la awm a, pass pathum emaw chu a neitu hmuh zawh loh a ni," a ti. Hemi chungchangah hian Minister chuan, "Ram neitute ṭha taka kawm a, AR huam chhunga an ram pass chu hmun danga ram nen thleng tura ngen tur emaw ni tihte rilruah a awm," a ti.

REVENUE MINISTER SAWI DANGTE

* LSC siam leh a kaihhnawih thil tihnaah dawhkan a paltlang tam lutuk tihtlem dan kawng zawn mek a ni.

* LRS dept-in chak zawka hna a thawh theih nan Aizawl district bik hi district pahnih - North leh South-ah ṭhen tum a ni. North lamin Chanmari leh a hmar lam zawng huamin, khua/veng 68 a awm dawn a, South-in Zarkawt leh a chhim lam zawng huamin, khua/veng 84 a huam ang. District ṭhenah hian July 25, 2024 khan notification chhuah a ni tawh a, October 1, 2024-ah a nih dan tur ang taka hna an thhawh ṭan theih beisei a ni.

* Saitual, Khawzawl leh Hnahthial district-ahte settlement officer (SO) leh thawktu dang dah thuai tum a ni a, DPAR-in post siam a phal tawh a, Finance-ah dil leh mek a ni.

* Land record mumal zawk a awm theih nan Comprehensive System for Maintenance and Management of Land Records in Mizoram (e-RAM) buaipui mek a ni a, cheng vbc. 6.48 senna tur niin, hawn theiha peih a ni ṭêp tawh. e-RAM hmangin LRS dept record vawn ṭhat a ni ang. LRS-in a thawh thil chi hrang 16 chu online kaltlanga dil leh buaipui theih a ni tawh dawn a, thingtlang lam aṭang pawhin CSC hmangin tih theih a ni ang. File bo, file táng rei leh harsatna hrang hrang a tihbo beisei a ni.

* Ram pass leh a kaihhnawih lehkha pawimawh zawng zawng digital-a dah tum a ni a, directorate-ah tih ṭan tawh niin, district dang zawng zawngah kum 2025 chhungin record zawng zawng ditigal-a dah vek tum a ni.

* State sorkar leh central sorkar department-te an land lease copy LRS-a thehlut turin July 10, 2024 khan hriattir an ni a, hei hi an ram chin tihchianna leh ram humhalhna atana tih a ni.

* Ram buai tam zawk hi a neitute'n enkawla an humhalh ṭhat loh vang a ni a, ram leiah fimkhur tur leh mahni ram ṭheuh hunga humhalh turin mipui kan ngen.

* LRS dept-in mipuiin sawi duh an neihte an thlenna tur complaint box an siamah compliant 17 a lut tawh a, mipuiaw website-ah complaint 13 a lut tawh bawk. Complaint lut zinga a tam zawk chu chhan a ni tawh.

* Scheme pahnih - Digital India Land record Modernisation Programme leh Survey of Villages and Mapping with Improvement Technology in Village Areas (SVAMITVA) kan kalpui mek. SVAMITVA hnuaiah khaw 319 cover tur a ni a, khaw 279-ah drone hmangin thlalak a ni tawh a, Mamit district-a khaw 40 la cover loh a ni.

* Mipuiin stamp duty awlsam zawka an pek theih nan e-Stamping Rules siam a ni tawh a, July 2, 2024 khan Mizoram Gazatte-ah chhuah a ni tawh. Stamp paper lei ngai tawh loin, online hmangin e-stamp lei theih a ni ang.

* Ram lei leh hralh, dahkham leh thil dang atana registration fee pek ṭhin chu SBI Main Branch-ah kher kal ngai tawh lo turin district tina SO hnena pek theih turin ruahmanna siam a ni. Aizawl SO office-ah July 22, 2024 khan hman ṭan a ni a, district dangah pawh an hman thuai theih nan SO-te'n an bawhzui mek.

* AMC-in property tax a laknaah hlawhtling takin online hmangin a kalpui mek a; LRS dept pawhin online-a chhiah pek theih turin ruahmanna a siam a, kum 2025 ral hmain Mizoram pumah online hmanga tax pek kalpui tum a ni.