Assam sorkar nena inbiak turìn rah ṭha a chhuah ngei kan beisei - Home Minister

Home minister K Sapdanga chuan, Assam sorkar nena ramri chung­changa an inbiak tur chuan rah ṭha eng emaw tal a chhuah ngei an beisei thu a sawi.

Nimina amah kâwmtu thuthar thehdarhtute zawhna chhangin Home Minister chuan, "Kar hmasa khan Assam Home Secretary-in kan Home Secretary hnenah state pahnih Chief Minister-te lo inbiak tawhna bawhzuiin inbe tura rawn zin a rem leh rem loh a rawn zawt a, min rawn hrilh chhawng ve leh. Kan Chief Minister kan ráwn a, ani pawhin inbiak ṭha a tih avangin inbiak kan remchàn thu hriattir an ni," a ti.

K Sapdanga chuan, February 2024-a Assam CM leh Mizoram CM inkawm ṭumin Assam CM-in ramri chungchangah Border Protection & Development Minister rawn tirh thuai a tum thu a lo sawi tawh tih a sawi a, "Model Code of Conduct avangin a rawn kal lawk thei ta lo. MCC zawh hnuah an rawn bawhzui leh nghal a ni," a ti a, August 9, 2024-ah inbiak tum a nih thu a sawi.

Inbiakna chuan rah ṭha a chhuah ngei an bei­sei thu sawiin Minister chuan, "Eng anga thuiin nge hma­sawnna a thlen ang chu kan hre lo a, hma­­­sawnna erawh a awm ngei kan beisei. Anni lam pawh­in memorandum an rawn nei ngeiin a rin­awm a, keini lam pawh­­in memorandum kan nei dawn. Sorkar kal ta thu­kente pawh ken chhun­­­­zawm zel chin a awm ang. Sorkar thar nih vanga sorkar hmasa thu­ken paih vek kan rilru a ni lo," a ti.

K Sapdanga chuan, ramri chungchanga Mizoram sorkar dinna tur sawiin, "Sorkar tawhte dinna Bengal Eastern Frontier Regulation (BEFR), 1875 kha tuna kan inbiaknaah pawh kan dinna tur a ni ang. Ramria chengte'n buaina an tawh tawh lohna atan tharum ni loin, dawhkana chinfel tumin theihtawp kan chhuah dawn," a ti a; an sorkar hnuah ramriah status quo bawhchhiatna thar a la awm loa an hriat thu a sawi.

Home Minister sawi danin, inbiakna bawhzuia Mizoram sorkarin Assam sorkar enkawl zinga khaw 62 chu Mizoram chhung a nih thu Assam sorkara an thlen chungchangah chhanna an la dawng lo. Hemi chungchang hi tun ṭum an inbiak lehna turah pawh sawi chhuah an tum. Inbiakna neih zawhah state pahnih minister-te'n joint press conference an nei nghal ang a, an inbiakna tlangpui an sawi dawn a ni.