Aikal lak zat leh an dinhmun department 11-in thehlut tawh
Mizoram sorkar hnuaia department hrang hrang zinga 11 chuan an department chhunga aikal la zat leh an dinhmunte Department of Personnel and Administrative Reforms (DPAR)-ah an thehlut tawh.
Aikal lak chungchangah hian DPAR Secretary chuan June 19, 2024 kha office memorandum a tichhuak a, aikal late chu memorandum tihchhuah aṭanga ni 30 chhungin an hna zawm vek turin a hriattir. Hna zawm lote chu dan loa châwl (unauthorised absence)-ah ngaih an ni dawn tih a tarlang.
Aikal late chung-changah a ṭul anga hma laa bawhzui turin department/office hotute hriattir an ni a; an bawhzui dan (compliance report) chu hriattirna chhuah aṭanga ni 45 chhungin DPAR (ARW)-ah thehlut tura tih an ni.
Aikal lak theih hun chhung a tàwp tawh a, department hotute'n aikal chungchanga an department dinhmun an thehluh theih hun chu August 3, 2024-ah a tawp ang.
Nimin thleng khan department 11-in DPAR (ARW)-ah an department/office-a aikal lak dan dinhmun an thehlut tawh a; chu'ngte chu Art & Culture, Excise & Narcotics, Fisheries, Irrigation & Water Resources, Land Resources, Soil & Water Conservation, Local Administration, Tourism, Transport, Printing & Stationery leh Chief Electoral Office-te a ni.
Report thehluh hun a tawp hunah department hrang hranga aikal dinhmun hi a ruala hawn tur a ni a; hun tiam chhunga thehlut lo department an awm chuan sorkarin an chungchang a ngaih-tuah ang.