World Hepatitis Day hman a ni

Health & Family Welfare department leh pawl hrang hrangte chuan nimin khan Taxation Auditorium-ah World Hepatitis Day an hmang a, Health & Family Welfare minister Lalrinpuii'n a hmanpui.

World Hepatitis Day hi July 28 a ni a, kuminah Pathianni a nih avangin nimin khan hman a ni. Kumina World Hepatitis Day thupui chu 'Its time for action' (A taka chêt chhuah hun a ni) tih a ni.

Health Minister chuan, "Khawvel huap pawhin hepatitis ûm bo turin chak taka hmalak mek a ni a, hemi atan hian mi tinin mawhphurhna pawimawh tak kan nei," a ti a; mipui vantlangah zau zawka hepatitis laka invên dan leh hepatitis veite enkawl dante puangzar turin kal khawmte a sáwm.

World Hepatitis Day hmanaah hian NHM, NVCHP, MSACS, PATH leh SHALOM Society hruaitute bakah, Aizawl West College, Aizawl North College leh ICFAI Univer-sity-a zirlaite an tel a; inkhawm zawhah Health department-in a thlâwna hepatitis leh HIV enfiahna hun an buatsaih a ni.

National Health Mission mission director Dr Eric Zomawia'n hepatitis inkai chhâwn theih dan leh a lan chhuah dante a sawifiah a; NVHCP nodal officer Dr Doris Lalnunmawii Sailo-in World Hepatitis Day thupui leh hmathlirte a sawifiah. SHALOM Society chief executive officer Dr Chawnglungmuana'n hepatitis laka inven dan tih thupui a sawi bawk.