Remal tuartu naupang chhawmdawlna pe

Social Welfare, Tribal Affairs, Women & Child Development minister Lalrinpuii chuan nimin khan Hyve Aizawl City Hall-ah Mission Vatsalya leh Mission Shakti kaltlangin Cyclone Remal vanga vanduaina leh harsatna tâwk naupangte hnenah chhawm­dawlna thawh khatna a hlan.

Aizawl District Child Protection Unit leh Child Welfare Committee chuan May 31, 2024 aṭanga July 5, 2024 chhunga Aizawl leh a chhehvela Cyclone Remal-in chhiatna a thlen tuartu naupangte a zir chiang a, chhiatna thlengin a nghawng zingah naupang 96 an tel tih an hmu chhuak a ni.

Chhawmdawlna hlanna inkhawm, Remal's Child Victim's Compensation Programme-ah hian Mission Shakti hnuaia Beti Bachao, Beti Padhao (BBBP) aṭangin hmeichhe naupang 28-te SSA account hawnsak an ni.

Naupangte'n ei tur ṭha an neihna tur te, an lehkha zirna puitu tur leh hriselna ṭha an neih theihna atana an inenkawlna turin Mission Vatsalya hnuaiah Juvenile Justice Fund aṭangin naupang 16 hnenah kum khat chhung atan thla tin Rs 2,000 ṭheuh chhawmdawlna (sponsorship) pek a ni a; naupangte chu gift package pek an nih bakah, mi inphalte'n stationery thil an pe bawk.

Minister Lalrinpuii chuan, Cyclone Remal vanga mi tam takin an in leh lo an chán leh thih phah an awm te, chhungkaw eng emaw zat relief camp-a an awm a ngaite chu pawi a tih thu a sawi a; Remal tuartu naupangte chu sorkar aṭanga ṭanpuina awm ang ang hmanga tuamhlâwm an nih tur sawiin, "Chhawmdawlna pekte hi mamawh hmasa zuala ngaihte an ni a, chhawmdawlna la dawng ve lote pawhin an la dawn zel theih nan theihtawp chhuaha hmalak zel a ni ang," a ti.

Health Minister chuan, ṭanpuinate ṭangkai tak leh hmasawn nana hmang tur leh chhelna leh beiseina nen hma hun thlir tlat turin naupangte a chah a; naupang seilenna in chhungkhur him leh hlim siam tura hma la ṭheuh turin nu leh pate a chah.

Lalrinpuii chuan, "Khuarel chhiatna tuartu naupangte hi The Juvenile Justice (Care and Protection of Children) Act, 2015 chuan a bika enkawl leh venhim ngai, children in need of care and protection a tihte zinga mi an nih avangin ngaih pawimawh an ni," a ti bawk.

Chhawmdawlna hlan inkhawm hi Women & Child Development director Zoramthangi Chhangte-in a kaihruai a; Mizoram State Child Protection Society principal programme manager Amy Lalrinpuii'n Cyclone Remal's Child Victim Compensation Programme kaltlanga naupang chhawmdawl leh ṭanpuina kalpui dan a tarlang.