ZPM ministry-in ram tana thil ṭha tam tak a ti tawh - ZPM Vice President

ZPM vice president C Lalnunnema chuan nimin khan ZPM pisaa inkhawmah thu sawiin, chief minister Lalduhoma kaihhruai ZPM sorkarin thla rei lo tê chhunga hma a laknate chu duhthusam vek ni lo mah se, ram tana thil ṭha tam tak a tih tawh thu a sawi.

C Lalnunnema chuan, MLA inthlanpui neih dawnah 'ZPM chu kan danglam ngam tur a ni,' tiin an au ṭhin thu leh Pathian leh mipui zarah sorkarna an chan thu a sawi a, "Famkim loin duhthusam ang duak duakin thil kal lo mah se, thla rei lo tê chhungin CM Pu Lalduhoma kaihhruai ZPM ministry hian ram tana thil ṭha tam tak a ti tawh a ni," a ti.

Sorkar hmalakna sawiin Lalnunnema chuan, “Kan policy angin MLA-te mimal motor lei ṭhin tihtawp a ni a, CM leh minister dangte household MR a zatvea tihhniam a ni. Heng aṭang ringawt pawh hian sorkar sum ṭhahnem tham tak kan hum thei a, inrenchemna kawngah nasa takin ke kan pên mek a ni," a ti a; sorkar hmasa huna K Deposit-a bill táng cheng vbc. 425.29 pek chhuah a ni te, healthcare bill leh bill hrang hrang táng pek chhuah a ni te, sorkar hnathawkte'n thla tira hlawh an la thei tate chu ropui a tih thu a sawi.

ZPM Vice President chuan, ZPM sorkarin zirna nasa taka siamṭhat a tum thu sawiin, "Tun hnaiah casual teacher ṭhahnem tak Recruitment Rules ang thlapa lak a ni a, sorkar hmasa huna SEDP teacher lak dan nen a danglam ta hle," a ti.

C Lalnunnema chuan, zirtirtu quarters leh sikul sakah hma thar lak zel tum a nih thu te, aikal lâk tihtawp tumin sorkarin huaisen taka hma a lak mek thu te, PHC-ah doctor dah kim thawhkhat a nih tawh thu te, Universal Health Care Scheme buaipui mek a nih thu te, kawlphethaa intodelhna turin hmalak mek a nih thute a sawi bawk.