Naupang rûkbo chungchang zirho a ni; Mihring rukbo, lei leh hralh a hluar zel

Mizoram State Commission for Protection of Child Rights (MSCPCR), National Commission for Protection of Child Rights (NCPCR) leh Lawngtlai DC office chuan nimin khan Lawngtlai DC conference hall-ah 'A campaign on pre­venting and combating child traffic­king in 100 bordering and adjoining districts of India' an buatsaih. Dan loa mi rûkboa hralh leh lei (human trafficking)-in hluar lam a pan zel tih tarlan a ni.

Zirhonaah hian sorkar hotute bakah MHIP, Lai Women Association, MUP, Central YLA, BSF, Juvenile Justice Board (JJB), anganwadi worker, NSS leh Lawngtlai College zirlaite an tel.

Zirhonaa tarlan danin, National Crime Record Bureau (NCRB) chuan India ramah kum 2022 khan dan loa mihring lei leh hralh thubuai 6,036 a chhinchhiah a, chu'ng zinga 2,878 chu naupang an ni.

Lawngtlai SDO (Sadar) Margaret J Vanlalremmawii chuan, Mizoram leh Lawngtlai district-ah naupang rûk leh hralh (child trafficking) a la tam lutuk lo a, khawvel hmun dangah a hluar thung tih a sawi a, "Lawngtlai district-ah international border - Myanmar leh Bangladesh a awm avangin mi tin kan inrálrina kan inven a ṭul," a ti.

Zirhonaah hian danin human traffic­king a hrilhfiah dan te, naupangte'n Indian Constitution-a chanvo an neih te, dan hmanga hmalak dan te, NCPCR din chhan leh hmalak dan te, Commission for Protection of Child Rights Act 2015 chungchang te, human trafficking leh child trafficking chungchang leh a kaih­hnawih thil hrang hrang zirho a ni.

ZIRHONAA TARLANTE

☑ Cyber era a nih tawh avangin online hmanga child trafficking kalpui a hluar.

☑ Naupangte'n zalen taka mobile phone an khawih tawh avangin naupang tam tak dinhmun a derthawng thei.

☑ Internet kaltlangin naupang tam tak bum chhuah an ni.

☑ Nu leh pate an fimkhur a ṭul a, naupang rûkbo an nih aṭanga darkar 1 a pawimawh zual.

☑ Puitlingah, a bik takin hmeichhiate dan loa hralh leh lei a tam.