Adviser to CM-in NHIDCL hotute a kâwm

Adviser to CM (Technical) Ginzalala, MLA chuan nimin khan a pisaah National High­way enkawltu NHIDCL hotute a kâwm a, NH-306 leh NH-6 in a pal­tlang Vairengte leh Kolasib inkara kawng­pui thlûr li (four lane) siam chungchang a sawi­pui.

Ginzalala chuan, Vairengte leh Kolasiob inkar kawng chu CM-in chak zawka siama hna thawk turin NHIDCL a duh thu a sawi a; forest clearance leh harsatna dang an tawh chungchang NHIDCL-in an sawiah theihtawp a chhuahpui tur thu a hrilh.

Kawngpui siamnaah environment dîm tura NHIDCL chahin Ginzalala chuan, "A remchang lai laia leivûng paih liam mai loin, a theih chin chinah mumal taka spoil bank siam a ṭul. Spoil bank siam hi leivung paihna mai ni loin, a hnu zelah mipui tana ṭangkai - park siam nan te, truck chawlhna atan te, kawngpui kual lutuk tur pawh ngil nante leh thil dang dang atan hman ṭangkaina theih a ni," a ti a; chutiang tur chuan hma la turin NHIDCL hotute a chah.

Adviser to CM chuan, thingtlanga kawngpui sialnaah kawngpuiin a paltlang khuate hun kal zel tura an khaw zauhna leh changkanna dang keng tel thei tura kawng zawn thiam a ṭul thu sawiin, chutianga hma la tur chuan Mizoram sorkarin NHIDCL-te a beisei tih a sawi a; India leh Myanmar ramri hrûla kawngpui pawimawh tak kal tur pawh chak zawka hmalak a, hna ṭan vat ni se an duh thu a sawi bawk.

NHIDCL hotute chuan, Adviser to CM thurâwnte chu ṭha an tih thu leh zawm ngei an tum tur thu an sawi a; NH-06 & 306-a harsatna an tawhte sukiang tura hmalakpui a tum avangin an lawm thu an sawi bawk a ni.