MNF sipai thubuai tihtawp dan sawifiah

Ex-Mizo National Army (MNA) hruaitute chuan nimin khan Aizawl Press Club-ah thuthar thehdarhtute an kâwm a; kum 40 hnuah MNF sipaite thubuai tihtawp a nih thu sawiin, thubuai chinfel a nih theihna tura an hmalaknate an sawifiah.

Ex-MNA hruaitute chuan, MNA member pathum - Sgt Lalzarliana s/o Lalhmingthanga, Thenzawl, Pte Biakhluna s/o T Lalhnema, Kolasib leh Pte Vanlalhruaia s/o LK Siama Thingkangphai, Churachanpur-te chu Churachanpur-a State Bank rawka puh an nih avangin man an nih thu an tarlang.

Mi pathum man chungchangah Ex-MNA hruaitute chuan, "Kum 2005 khan Manipur Chief Judicial Magistrate thupekin Lalzarliana leh Biakhluna te manna thupek (warrant of arrest order) Mizoram Police-ah an rawn thawn a, man an nih hnuah Chief Judicial Magistrate, Churachanpur court-ah hruai tura tih a ni," an ti a; Ex-MNA mite aiawha ding turin ukil N Koteswar Singh rawih a nih thu leh Mizoram sorkar aiawha ding turin ukil Serto T Kom (Athang) rawih a nih thu an sawi.

Manipur-ah Ex-MNA hruaitute chu vawi eng emaw zat an kal thu sawiin, "Thubuai tifel tura hmalak a nih lai hian India sorkar hruaitu hrang hrang hmuin, kan hmuh lohte pawh lehkha ziaka pein thubuai titawp turin kan ngen a, lehkha kan pek zawng zawng hi 30 aiin an tam," an ti a; nasa taka hma an lak hnuah July 23, 2024 khan thubuai tihtawp a nih thu an sawi a ni.