Saitualah Legal Metrology a awm an duh

Saitual District Consumer Protection Council Committee chuan nimin khan district bawrhsap Dr Lalngura Tlau hoin DC conference room-ah an ṭhutkhawm hmasa ber an nei a; Saitual district-ah Legal Metrology awm tura hmalak an rêl.

Ṭhutkhawmah hian consumer-te'n harsatna an tawh ṭhin hrang hrang sawi a ni a; Saitualah Legal Metrology awm tura hmalak an rêl bakah, mipui hnena awareness neih dan tur te, ration card leh gas chungchanga harsatna awm ṭhin chinfel dan turte an sawiho a ni.

Saitual Bawrhsap chuan, mipuite'n an dikna chanvo an hriat tâwk loh ṭhin avangin sumdawngte'n sum tam tak an eisak fo tih a sawi a, "Mahni dikna chanvo ṭheuh hre chiang lehzual tura veng/khaw tina consumer union din a ṭha. Mipui hi consumer leh service provider kan nih kawp fo avangin buaina leh harsatna tam tak a awm ṭhin," a ti.

Ṭhutkhawmah hian Saitual SDO (Sadar) Lalṭhakima Chhangte, district civil supply officer Zairemkima, sorkar hotu dang te, Mizoram Merchant Association, Saitual District Consumer Union leh tlawmngai pawl dang hruaitute an tel a ni.