KHAWTHLIR

Thuthlung ziak

Zirtiri Residential Science College leh ICFRE-Bamboo and Rattan Centre, Bethlehem Vengthlang chuan nimin khan Durtlang Leitana ZRSC campus-ah zirlaite hamṭhatna atan thuthlung, memorandum of understanding an ziak. MoU hi research, education leh thil dang ṭhenkhata hmalakhona tur a ni a, kum 5 chhung atan a ni. MoU-ah hian ICFRE Aizawl Centre hotu Sandeep Yadav leh ZRSC principal Prof. B Zoliana ten hmingan ziak.

AR-in meth man

Assam Rifles sipaite chuan July 28, Pathianni khan Zokhawtharah Methamphetamine kg. 20.665 an man a, Zokhawthar police-te hnenah an hlan chhâwng. Meth an man hi Rs 61,99,50,000 hû a nih thu an tarlang.

PYD-in thisen pe

Pentecostal Youth Department (NEI) Ṭawipui Bial chuan nimin khan Thingfal community hall-ah Lunglei District Hospital tan thisen unit 39 an pe a, petute mipa 36 leh hmeichhia pathum an ni.

Subject Committee

Mizoram Legislative Assembly hnuaia Subject Committee-IV chu an chairman Lalmuanpuia Punte kaihhruaiin nimin khan Assembly Annexe committee room-ah an ṭhukhawm a, sorkar department hrang hrangte hmalakna an zir. Subject Committee IV-ah hian chairman bakah member dang pariat an awm a ni.

Harsatna thlenna

Champhai District Consumer Disputes Redressal Commission chuan thuchhuah siamin, thil leinaa harsatna hrang hrang - online shopping leh delivery, warranty-a buaina, thil man bituk aia toa chhiar leh thil lei ṭha lo leh hmélhem chungchanga harsatnate Commission President - Champhai District & Session Judge leh Registrar (DCSO) hnenah ziakin emaw, online-in https://edaakhil.nic.in/ ah thlen theih a nih thu a tarlang.