NE Youth Festival 2015 ṭan a ni

Nimin khan Mizoram University Mulripurpose Hall-ah 'North East Youth Festival 2015' ṭan a ni a, Sports & Youth Services minister Zodintluanga'n a hawng. Minister chuan, hmarchhak ṭhalaite chu hmarchhak state hrang hrangte inkarah boruak ṭha a awm zel theihna atana theihtawp chhuah zel turin a chah.

Zodintluanga chuan, "Ramin hma a sawn zel theihna turin inpumkhatna ṭha tak neih zel a pawimawh a, inpumkhatna tichhe thei boruak awm ṭhin mah se, hmarchhak mite hian ram inpumkhatna atan theihtawp chhuah zelin, kan thawk chhunzawm zel tur a ni," a ti.

Sports Minister chuan, "Hmarchhaka hnam hrang hrangte hian zirna leh hna lamahte ngaihhnathiamna reservation leh quota-te nei mah ila, mahni thiamna, tumruhna leh taimakna nen theihtawp kan chhuah chuan quo­ta tel loin mi dang ang bawkin zirlaite hian hlawhtlinna an hmuh ngei ka ring," a ti a; hmarchhak ṭhalaite chu reservation leh quota tel loa hlawhtlinna chan tum turin a fuih.

Infiamna lama hmar­chhak hlawhtlinnate sawiin, Zodintluanga chuan, "Infiamna lama kan hlawhtlin ang hian thil dangah pawh hlawhtlinna leh mi theih ang kan hmarchhak ṭha­laite hian an thei a ni," a ti a; hlawhtlinna chang tur chuan tumruhna nen theihtawp chhuaha ṭan lak a ngaih thu a sawi.

MZU vice chancellor Prof. R Lalthantluanga pawhin thu sawiin, rem­na leh muanna tel loin hma­sawnna a awm thei lo tih a sawi a, zirlai kalkhawmte chu remna palai nih tum ṭheuh turin a chah.

North East Youth Fes­tival hi National Service Scheme (NSS) Regional Centre, Guwahati leh Mizo­ram sorkara Sports & Youth Services de­partment-a NSS Cell-te ṭangkawp buatsaih a ni a, February19 thleng a awh ang. Festival-ah hian hmarchhak state hrang hrang aṭangin zirlai 300 vel an tel a ni.