Phun sa enkawl ṭhat a pawimawh - PC Lalthanliana

District Horticulture Officer (DHO) chuan nimin khan Horticulture committee room-ah annual action plan meeting an nei a, an hun hmanpuitu Horticulture minister PC Lalthanliana chuan phun belh zel aiin phun sa enkawl ṭhat a pawimawh tih a sawi.

Horticulture Minister chuan, "Thei leh thlai tam tak chingin kan phun belh zel bawk lai hian a bikin ser ah phei hi chuan phun belh aiin phun sa enkawl ngun hi kan hlawk zawk ang em tih ngaihtuah a ṭul a ni. Mizote hian kan thlai leh thei phun reng reng hi a enkawlna kawng­ah kan in thlahdah a, a hun taka lei ṭha pekte kan ngaihpawimawh a ṭul," a ti a, thlai leh thei enkawl zui danah tun aia ṭan lak loneitute'n an mamawha a hriat thu a sawi.

PC Lalthanliana chuan sum neih ang anga ruahmanna fel leh ṭha zawk neih ṭhiam ṭul a tih sawiin, "MP leh MLA zawng zawngten an bial ṭheuha model village an thlan turah an khaw thlante zir chianga Horticulture Model Village a nih theih nana a ṭul angin ruahmanna kalpui tum nise a ṭhat a rinawm," a ti.

DHO te chu an division huam chhungah, farmer-te an potential area neih dan a zirte ngaihtuah pui chunga hlawhtlinna tlang thlenpui tumna tak tak a, theihtawp chhuah ṭheuh turin PC Lalthan­liana chuan a chah.

Meeting-ah hian parliamentary secretary (Horticulture) K Lalrinthanga leh Horticulture secretary H Lalhming­thangate pawh an tel a ni.