JERC hnuaiah power tariff sawiho a ni Sorkar leh NGO-te ngaihdan inang lo

Joint Electricity Regulatory Commission (JERC) for Manipur and Mizoram-a State Advisory Committee chu nimin khan I&PR Conference Hall-ah an ṭhu a; Power & Electricity department-in kawlphetha hman man thar an siamah sorkar leh tlawmngaite ngaihdan a inang lo.

Nimina meeting-ah hian JERC hotute bakah, P&E hotute leh Central YMA, AMFU leh Mizoram Chamber of Industries hruaitute an tel a ni.

P&E department hotute chuan, power tariff thar an siamah ngaih ṭhat lohna tur a awm loh thu an sawi a; chutih laiin, tlawmngai pawl aiawhte chuan kawlphetha hman man thar tura ruahman chu ngaihngam taka pawm chi a ni lo tih an sawi thung.

P&E houte chuan, power tariff chu anmahni duh dan ringawta an siam a ni lo a, mi dangte nena siam niin an sawi a, mi ṭhenkhat hlauhthawn ang em ema sang a ni dawn lo niin an sawi.

Central YMA, AMFU leh MCI aiawhte erawh chuan, kawlphetha hman man thar chu an enho phawt loh chuan hman loh ni se an ti a; power tariff punna chu a sang lutuk nia an hriat thu leh mipui phurrit a tling dawna an ngaih thu an sawi.

NGO aiawhte chuan, kawlphetha hman man a sang chak hle a, chutih laiin kawlphetha a ṭha chuang si lo niin an sawi a, "Bulb-ah watt tlem chi hman a nih pawhin, bill-in san lam a pan zel a, a manganthlak hle a ni," an ti.

NGO hruaitute chuan, P&E department chu corporation-a dah ṭha an tih thu sawiin, P&E department-a thawktu awm zat RTI Act hmanga hmanga vawi tam tak an zawh tawhah chhanna a inang ngai lo niin an sawi a; khaw 2,000 chuang awmna, Manipur-ah P&E dept-ah thawktu mi 3,500 vel an awm laiin, khaw 900 tling lo awmna Mizoramah chuan P&E-ah thawktu mi 4,500 chuang an awm niin an sawi bawk.

Hetih lai hian, P&E department aiawhte chuan Mizoram chu India rama power supply ṭhatna pawl tak niin an sawi a, electric bill pawh a sang lo nia sawiin, "Mipuiin an rilru puthmang an thlak a ngai a, bill sang an tih ṭhinte hi an chhit zat nena chhûtin a sang lo a ni," an ti.

JERC meeting hi chairman A Chhawnmawia'n a kaihruai a; P&E department-in power tariff thar a ruahman chungchangah hian vawiinah mipui ngaihdan an la dawn a ni.