Raicheha thih vangin Kolasib PS-ah FIR thehlut

Steve Lalhruai­chhuaka, Kolasib Electric Veng chuan February 3, 2015-a Kolasib District Hospital-a a nupui, Babie Zothanpari (24), raicheha a thih dan chu chhui chiang turin February 14, 2015 khan Kolasib Police Station-ah FIR a thehlut.

Steve Lalhruai­chhuaka ziah danin, Feb­ruary 3, 2015 zan dar 6:55-ah Kolasib dam­dawi-inah nau a nei a, thisen nasa takin a chhuak a, doctor-te'n zan dar 8-ah thisen unit 3 pek a ngaih thu an sawi.

Lalhruaichhuaka chu blood bank-ah thisen lak tumin a kal a, thisen unit thum lak chhuah nan Rs. 1,650 (unit khat Rs. 550) a ngaih laiin, Rs. 700 chiah a neih avangin ATM booth-a pawisa lak tumin a kal. ATM a hman theih loh vek avangin blood bank-ah a let leh a, blood bank-a duty chuan pawisa pek hmasak loh chuan thisen a pek theih loh thuin a lo chháng. Thisen an pek theih mai si loh avangin a nupui chu a thih phah taah ngaiin, FIR a thehlut ta a ni.

Kolasib Hospital-a thawkte chuan Steve Lal­hruaitluanga chu an tawrhpui thu an sawi a; chutih rualin, thil hriat sual palh a neia an hriat thu sawiin, thisen a hun taka pek loh a awm lo niin an sawi. Kolasib Hospital-a doctor-te chuan, engkim ti thei an nih loh avangin theihtawp chhuah mah se, an damlo enkawlte an thih cháng a awm ve tho tih an sawi bawk.