RSBY leh BPL-a awm tan Thisen sawngbawlna man pek a ngai lo

Health minister Lal Thanzara chuan, tun hnaia Kolasib damdawi-ina nu nau chunga thi an awm chungchangah, "Department lamin tihdik loh an nei a nih chuan an tuar mai tur a ni," a ti a; RSBY hnuaia awmte leh BPL chhungkuaa mite tan thisen sawngbawlna man pek a ngai lo tih a sawi.

Health minister hian February 17 zinga Mizo High School Field-a district hrang hrang pan tur National Vaccine Van a vai liamnaah thu sawiin, Kolasib damdawi-ina nau chunga nu pakhat a thi chu pawi a tih thu leh chhiat tâwk chhungte amah leh Health department-in an tawrhpui thu a sawi a, "Thil awm dan chhui chiang turin senior officer-te a hmunah tirh an ni," a ti.

Lal Thanzara chuan, social media-ah thisen man pek tur neih loh vanga thisen dawng lo leh thisen pek har vanga thi ni âwma sawi chu, thisen unit thum pek chhuah a nih thu a sawi a; unit khat leh a chanve vel a dawn mek laiin a thi ta niin a sawi a, thisen lak chhuahna tur pawisa neih loh vang leh thisen pek duh loh vanga nunna chán a nih loh thu a sawi.

Health minister chuan, RSBY-a inziak lut te, BPL chhungkuaa mi te, thalasemia, haemophylia, aplastic anaemia veite leh emer­gency-a thisen pek ngai, chhungte awm remchang loah chuan thisen sawngbawlna man chawi a ngai lo tih a sawi a, "Thisen mamawhtute’n processing fee chawi tur an neih lo emaw, an remchang lo emaw a nih pawhin thisen an pe chhuak ngei ngei tur a ni tih hriattirna Health department-in a tichhuak tawh a ni," a ti.

February 17 veka Samaritan Society of Mizoram silver jubilee lawmnaah Lal Thanzara chuan, thisen sawngbawlna man sorkarin a lak chu miretheite'n harsatna an tawh phah dawn lo niin a sawi a, "Sorkarin thisen sawngbawl nana Rs. 1,500 a sên phuhruk nana Rs. 550 lak hi a mamawhtu tan chuan a na lo," a ti bawk.

National Vaccine Van hi a chhung lam a bik taka chei a ni a, kawng nâl leh chhe deuhah pawh táng mai lo tura a bika an siam a ni.

Thingtlang kilkhawr zawkah pawh damdawi phurh thlen zung zung theihna tura ruahman niin, kum 2013 khan Mizoramin pahnih a lo dawng tawh a, tun hnaiah pariat dawn belh lehin, a vaiin 10 a dawng ta a ni.