Eptu MLA-te'n Lungleiah press mi kâwm

Mizoram Assembly-a Mizoram Democratic Alliance (MDA) Legis­lature Party MLA-te chuan, nimin zing khan Lunglei Circuit House-ah Lungleia thuthar theh­darhtute an kâwm a, Febuary 25, 2015-a Mizoram puma total bandh huaihawt an tum chhante an sawifiah.

Nimin vek khan khum 50 awm theihna tur Hnahthiala hospital building leh Hnahthial Tuilak reservoir-te an tlawh.

Eptu pawl MLA-te hian an leader Van­lalzawma hoin February 17 khan Lungleia sorkar hmun hrang hrang - J Buana College building sak mek, ran talhna in, Lunglei Civil Hospital leh Zobawka District Sports Complex siam mek­te tlawhin an enfiah.

Eptu MLA-te chuan, Rs. 1,43,35,000 sênga J Buana College sak mek chu sorkarin contractor hnena sum pek tur a nei lo chunga ṭha taka sak a nih avangin lawmawm an tih thu an sawi a; contractor chu zirlaite hmakhua ngaia ṭha taka sa chhunzawm turin an chah a, sorkar chu contractor hnena a rang thei ang bera sum pe turin an ngen bawk.

MDA leader Van­lal­zawma chuan, eptu an nih avangin Assembly House-ah sawisel tur ringawt an ni lo a, ram tana thawktu an nih avangin sorkar tih dik lohte leh thawh ṭhat tawk lohte finchhuahtu nih an tum avangin Lungleia sorkar hnathawhte an en tih a sawi. Vanlalzawma bakah hian eptu MLA dang - Lalruatkima, Lal­thanliana leh Lalrinawma te an kal a ni.