AMC hotute'n bawlhhlawh paihna tur enfiah Kawngpui tur laih zau tawk lo a awm

Aizawl Municipal Council (AMC)-in Aizawl khawpui chhung bawlhhlawh paih khawm­na tura an ruahman, Hual­ngohmuna dumping ground tur buatsaih mek panna kawng siam mek chu nimin khan AMC chairman CT Zakhuma leh hotu dangte'n an tlawh a, hnathawh dan an enfiah.

AMC hotute chuan, kawng laih mek chu hmun ṭhenkhatah a zau zawng tura bituk metre 6 tling lo an hmu a, chhuk ulh lai deuh siam rem ngai a awmin an hria bawk a; an thil hmuh chung­changah hian a enkawltu engineer leh contractor-te sawipui ni se, an ti.

Hualngohmun dumping ground tur panna kawng laih mek hian mimal ram 13 a tan tlang a, Hualngohmun V/C hotute leh ram neitute inbiak­remna angin kawng atana mimal ram laih chhiatah ram neitute'n zangnadawmna an phût lo. Dumping ground tur pawh hi Lal­ṭanpuia Varte, Ṭhuampui Vengin a thlawna a pek a ni a, bigha 53.5-a zau a ni.

Dumping ground panna kawng laih mek enfiahnaah hian AMC Chairman bakah, vice chairman C Lalsawivunga, executive councillor Lalzir­liana leh Rosiamngheta bakah, councillor PC Lalruatsanga, Ram­hlunsanga leh Lalhuthangi Hmar te an kal a ni.