Mawhphurna la ngam loah Thanzara puh

MNF party chuan thu­chhuah siamin, Health minister Lal Thanzara chu mawhphurhna la ngam loah an puh a, "Mizoramin mawhphurhna la ngam lo Health Minister a mamawh lo," an ti.

MNF chuan, tun hnaia Kolasib district-a nu nau chung­a an thih chhanah thi­sen sâwngbawlna senso Rs. 550 an neih loh vang a nih thu, Kolasib CMO-in a sawi chu Health Minister-in phat marna a zawng niin an sawi a, "Vanduaina tâwk chhung­kuate thamlohna leh hmuhsitna a ni," an ti.

Health minister Lal Thanzara’n, thisen hmangtute aṭanga Rs. 550 lak chu thisen mamawhtu tan a na lo hle anga a sawi chu mi retheite hmuhsitna dik tak nia an sawiin, MNF chuan, "Miin nunna hlu tak chána lu an sûn mek laia ram khat hruai­tuin hetianga a sawi duh hi khawhar chhungte tan chuan a thanatthlak lehzual," an ti. Babie Zothanpari w/o Steve Lalhruaichhuaka thih chhan, a natna hming sawifiah turin an phût a ni.

MNF chuan, thisen sawngbawlna senso Health care Scheme hnuaiah bill leh theih mah se, HCS-ah inziak lut lo mi tam tak an awm thu leh, MNF sorkar laia sorkar damdawi-in tinah ni khata darkar 24 chhung doctor duty ṭhin chu Congress sorkar hnuah doctor duty-te chu hmun danga an sawn nghal thu an sawi.

MNF sorkar laia 'OPD building chhawng bo' tih leh 'MMU motor a hlui' tihte chung­changah, eirukna a awm leh awm loh chu Congress sorkarin duh tâwkin an chhui thei a, an kutah file leh document engkim kum ruk chhung a awm tawh thu sawiin, "Eirukna sawi theih pakhat tal an nei em?" an ti bawk.