Legal Metrology-in tui meter 30,000 chuang an endik tawh

Legal Metrology hotute chuan, tui meter an endik chu tun hnaia PHE department-in an kuta an dah ni loin, an lo tih tawh sa a nih thu leh, tui meter 30,000 chuang an endik tawh thu Vanglaini an hrilh.

Legal Metrology department chuan, tui meter endik chu tun hnaia an kuta awm chauh ni loin, danin an kuta a dah, tun hma aṭanga an lo khawih tawh a nih thu an sawi a, "PHE department lamin an endik ve a ni mai thei a, mahse danin kan kuta a dah a ni. Endikna hmanrua pawh kan nei ṭha a, dan ang thlapa endik theihna hmanrua kan nei a ni," an ti.

Legal Metrology hotute sawi danin, tui meter hi a man a inang lo a, a ṭhat dan azirin a man a danglam a, a man bituk zat (maximum retail price) aia sanga hralh phal a ni lo. Tui connection-a hman a nih hmain Legal Metrology-te'n an endik hmasa vek tur a ni.