Police-in fitness an uar thar dawn; Kuhva man tawh rûkbo a ni lo - HM

Home minister K Sapdanga chuan, Mizoram Police-te'n taksa chak ṭhatna (fitness) lam an uar thar leh dawn thu a sawi a; police-in kuhva an man tawh sa kudam aṭanga rûkbo a awm loh thu a sawi bawk.

Thuthar thehdarhtu ṭhenkhatte'n an kawmnaah K Sapdanga chuan, police-te tan fitness pawimawhzia sorkarin a hriat thu a sawi a, "Kan police-te fitness a ṭhat lehzual theih nan hma kan la dawn. A bul ṭanna atan August 5, 2024 khian Mizoram police zawng zawngte a rualin zingah minute 45 chhung kan parade rual dawn. Mahni awmna hmun ṭheuhah parade a ni dawn a, Aizawlah chuan a huhoin 1st Bn. MAP Playground-ah hun hman a ni ang," a ti.

Home Minister chuan, a huhoa parade chu police-te fitness a ṭhat lehzual theihna tura an bul ṭanna tur a nih thu sawiin, "Mizoram Police Sports pawh kalpui a ni dawn a, chutah chuan a tam thei ang an tel theih dan tur ruahman a ni ang. Thil dang dangah pawh ruahmanna siam a ni," a ti a, police-te fitness a ṭhat lehzual theih nan theihtawp an chhuah dawn thu a sawi.

Police-te'n kuhva rah an man sa kudam aṭangin a bo anga mi ṭhenkhatin an sawi chungchangah K Sapdanga chuan, "Police-in kuhva rah an man sa bo a awm lo. Kudamte endik a, kuhva rah ip awm zat chhinchhiah a ni. A hnuah manin, kudam kalh a ni. Kan man ngei dawn tih an rin avangin a neitute'n kan la man hma siin an lo la chhuak. Heng kuhva rah an lo lak chhuahte pawh hi police leh kuhva chingtute ṭangkawpin eng emaw zat an hmu chhuak leh tawh," a ti.

Home Minister chuan, kuhva rah tawlhrûk a reh theihna turin theihtawp an chhuah tih sawiin, "Kawng rûk ringawt pawh 30 vel an siam a, kawng rûk hêlnate pawh an siam leh zel a. Chuti chungin theihtawp kan chhuah a, MNF hun lai ai chuan kuhva rah tawlhruk a tlem tawh hle a ni," a ti a; police-te pawh na zawka kuhva rah tawlhruk a reh theihna atan an innawr thu a sawi bawk.