Central-ah cheng vbc. 200 vel dil

Mizoram sorkar chuan Cyclone Remal vanga chhiatna thlengah chhawmdawlna atan sorkar laipuiah cheng vbc. 200 vel a dil.

Disaster Management & Rehibilitation (DMR) department hotute hnen aṭanga thu dawn danin, Cyclone Remal-in chhiatna hrang hrang a thlente chu zir chian a nih hnuah sorkar laipuiah cheng vbc. 200 vel dil a ni. Sorkar laipui aṭangin chhanna a la awm loh avangin sum hmuh a nih dawn leh dawn loh leh, sum hmuh tur zat hriat theih a ni lo.

Mizoramah Remal vanga chhiatna a thlen laiin sorkar laipui aṭangin State Disaster Respond Fund (SDRF) hmuh tawh a nih avangin chhiat tâwkte chhawmdawlna leh mitthite râlna sum pek nghal theih a ni a; chutihrualin, chhiatna thleng chu a nasat avangin inrin lâwk aia tam sum sên a ni tawh.

Cyclone Remal kaih­hnawih vek a nih avangin PHE department tui pump-na hmun chhia siamna leh kawng chhe siamna atante pawh SDRF hman a ni.

Sorkar laipuia cheng vbc. 200 dil mek chu hmuh a nih chuan kumin sorkar kum kal mekah chuan harsatna lutuk tawk loa an kal theih DMR department hotute chuan an beisei.

Tarlan tawh angin, sorkar laipui chuan Cyclone Remal vanga chhiatna Mizoramin a tawrh dan endik turin Inter Ministerial Central Team a rawn tir tawh a; Central Team hian chhiatna thlenna hmun hrang hrang an endik hnuah sorkar laipuiah report an thehlut a ni.