Heroin vangin kum 10 táng dawn
Kolasib Fast Track Court chuan heroin kawltu Lily Zothanpari (30) d/o Lalhuma, Kolasib Ṭumpui leh Lalparmawii (38) d/o Lalchuanawma, Sawleng-te chu kum 10 chhung lung-ina táng tur leh Rs 10,000 ve ve chawi turin a hrem.
Thu dawn danin, Excise & Narcotics department (END) chuan December 1, 2022 chawhnu dar 1:50 khan Lily Zothanpari hnen aṭangin an inah heroin (no. 4) hawng 50 (gram 853) an man a, Shillong lama hralh tur nia sawi a ni. Lily Zothanpari thurualpui Lalparmawii pawh an man bawk.
He thubuaiah hian END chuan thuhretu paruk an nei a; thuhretute thil sawi leh finfiahna aṭangin Kolasib Fast Track Court judge R Vanlalena chuan nimin khan judgement order a tichhuak a, Lily Zothanpari leh Lalparmawii te chu thiam loh chantirin, kum 10 chhung táng tur leh Rs 10,000 ve ve chawi turin a hrem. Pawisa an chawi loh chuan thla thum dang tàn belh turin a ti bawk.
Hmeichhe pahnih ruala man ve tho Zonunsangi erawh chu August 2024-a nau hring tur a nih avangin a thubuai tihkhawtlai rih a ni a, hun dangah la ngaihtuah leh tura dah a ni.