AAP Mizoramin AAP hotu Kejriwal chhuah an phût

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; a rang thei ang bera AAP convener Arvind Kejriwal, Delhi chief minister ni bawk chhuah zalen turin BJP sorkar an phût tih an puang.

AAP, Mizoram president Andrew Lalremkima chuan, BJP sorkar hnuaiah Arvind Kejriwal chu dik lo taka man a nih duh lohna leh lungawi lohna nimin khan India ram hmun hrang hrangah Indian National Developmental Inclusive Alliance (I.N.D.I.A.)-in an lantir thu a sawi a, "Mizoram AAP pawhin Mizoram mipui hriatah BJP sorkar thil tih dan kan duh lohzia lantirna atan press conference kan ko a, a rang thei ang bera Kejriwal hi chhuah zalen turin BJP sorkar kan beisei a, kan phût a ni," a ti.

Arvind Kejriwal chu BJP sorkar hnuaia agency hrang hrangin dik lo takin thubuai an siamsak a, March 21, 2024 aṭangin jail-ah dah a nih thu sawiin Andrew Lalremkima chuan, "Bail a nih theih lohna turin vawiin thlengin harsatna hrang hrang an siamsak reng a, hriatthiam har kan ti tak zet. Opposition party hruaitute sorkar agency hmanga beih a ni hi kan ram democracy-a mipui zalenna leh dikna BJP sorkarin a ngaih pawimawh lohzia a tilang," a ti a; agency-te'n finfiahna nei lo chungin PMLA Act hmangin Kejriwal chu jail-ah an khung niin a sawi.

Mizoram AAP Convener chuan, Arvind Kejriwal chu firfiak (terrorist) leh ram hmelma a ni lo tih sawiin, "A tihsual lian ber chu India khawpui Delhi-a mi narânte tana zirna ṭha a pek te, damdawi-in ṭha leh changtlung, mi narânte tana a thlawna inentir theihna a pe leh Modi-a kaihhruai thil tihsual leh tih dik lohte na taka a dem hi a ni," a ti.