RRF 1965 ṭhiah a nih theih nan hma la turin Mizoram sorkar phût

Land Owner's Association, Kolasib District (Package 3-8) member-te tun hnaia Kawnpuia inhmukhawm chuan, "Reverine Reserved Forest (RRF) Notification 1965 hi ṭhiah (de-notify) a nih theihna atan sorkarin hma la rawh se," an ti.

Ram neitute chuan, Forest Act, 1955 tlawhchhana kum 1965-a RRF Notification chhuah High Court-in January 27, 2021-a ṭhiah tawh tun hnaia Supreme Court-in tinung leh chu ṭha lo an tih thu an tarlang a, "RRF chhunga chengte dinhmun hi sorkarin tichiang vat rawh se," an ti a; RRF notification a nun leh tak avangin forest ram chhunga chengte hnawhchhuah a, an chenna tur ngaihtuah an phût.

Ram leh mipui tan RRF Notification chu a hnawksak nia sawiin ram neitute chuan, "Tinung leh tura Supreme Court-a Mizoram Environmental NGO Coordination (MENCO) bultuma petition thehluttute - Vanramchhuangi, VL Hrima, Romalsawma, Rongura Hrahsel leh Dr Lalbiakmawia Ngente te hi kan dem tak zet. Environmental NGO-te hi mipui harsatna siamtu leh ram hmasawnna dâltu dik tak an ni," an ti.

NGO-te'n thu dik tâwk lo hmangin court-ah petition an thehlut nia sawiin ram neitute chuan petition chu hnuhkir an phût a, "RRF Notification 1965 chungchangah hian Supreme Court pawhin mipui dinhmun thlir chunga thutlukna dik tak a siam ngei kan beisei," tiin, an dikna leh chanvo humhalh turin a tawp thlenga an beih dawn thu an tarlang.

Ram neitute chuan, petition thehluttute chu thu dik tâwk lo hmanga court-a petition thehlutah an ngaih avangin an thil tih dan chu court zah lohnaah an puh a, "An petition hi cancel theih a ni. A thehluttute hian pawisa tam tak an chawi theih bakah lung-in hial tàn theihna a ni. Danhremi (advocate) pawh hrem theih an ni a, an hna aṭanga bàn theih an ni," an ti.