Minister-in Fish Seed Farm a hawng

Agriculture minister PC Vanlalruata chuan July 29, Thawhṭanni khan North Chawnpuiah sangha chaw siamna, Ruattei Fish Seed Farm a hawng a; Mizoramah mipui eizawnna pui ber chu agriculture sector a nih avangin sorkarin kut hnathawktute chawikan zel a tum thu a sawi.

Ruattei Fish Seed Farm hi Fostering Climate Resilient Upland Farming System in the North East (FOCUS) District Management Unit, Kolasib hnuaia innovation fund Rs 30,08,000 sênga siam a ni.

PC Vanlalruata chuan, kut hnathawktu zingah sorkarin an bána a kaih zeuha hlawhtling thei tur an awm nual thu sawiin, "A zavai chuan thei lo mah ila, a theih chin chinah kan inkai chhuak zel dawn. Mizoramah chuan kan eizawnna pui ber chu agriculture sector a ni a, sorkarin kut hnathawktute chawikan zel a tum a ni," a ti.

Fish Seed Farm-a khawlte'n sangha chaw bakah, vawk chaw leh thil dang a siam chhuak thei dawn tih sawiin Minister chuan, "Kut hnathawktute'n nasa takin a zar an zo thei dawn," a ti a; hlawhtling taka kal zel turin duhsakna a hlan.