DIET quarters-ah ZPM party-a adviser ni mek a chêng - MPYCC

Mizoram Pradesh Youth Congress Committee (MPYCC) chuan, District Institute of Education & Training (DIET), Aizawl quarters-ah ZPM party-a adviser ni mek Lalthansanga te chhungkua an chêng niin an tarlang a; pawi an tih thu sawiin, a rang thei ang bera inthiar chhuak turin an ngen.

MPYCC hruaitute chuan an president Laltawnliana hoin nimin khan DIET Principal leh thawktute chênna in (quarters) an tlawh a; quarters chu DIET-a thawkte chênna tur a nih laiin, chief minister Lalduhoma campaigner leh ZPM Adviser a awm ve tih an hmuh chhuah thu an tarlang.

DIET-a thawkte chu thu an zawhfiah thu sawiin MPYCC chuan, "Thu kan zawhfiahna aṭanga a lan danin, quarters-a awm hming tumtu hi Pu Lalthansanga, ZPM PAC member hial lo ni tawh leh tuna adviser ni mek a ni a, an chhungkaw member zingah sorkar hnathawk emaw, DIET-a thawk emaw sawi tur an awm lo tih finfiah a ni. CM Pu Lalduhoma sawipui leh awmtir a nih thu kan dawng bawk," an ti.

MPYCC president Laltawnliana chuan, "ZPM-te'n an sorkar hmaa an insawi ang ni lo, 'Lal ngai lo lal a ná, an lal a khà' tih anga ro an rel leh ṭhin hi a pawi hle. Rinawm hmel takin mipuiah an inzuar a, an hun a thleng ta maw tihah dâwt ringawt hmanga an kal hi an demawm tak zet," a ti a; an chêt dan avangin ZPM party chu mipui tan thlàwp reng tlak an nih loh thu a sawi.

Laltawnliana chuan, DIET quarters luahtu tur ni loin an luah chu pawi an tih thu a sawi a, "A rang thei ang bera inthiar chhuak turin kan ngen. An chhuah leh chhuah loh kan en zui zel dawn. Hetianga party mi uchuak taka induhsakna an kalpui hian kalphung thar sorkar ṭhat lohzia a lantir chiang hleah kan ngai," a ti.