Viable economic chungchang zirho
Mizoram Youth Commission (MYC) leh Lunglei District Cooperative Union (LDCU) chuan nimin khan Lunglei Convention Centre-ah Symposium on Building Cooperative as Viable Economic Enterprises an buatsaih a, MYC chairman Malsawmzuala Ralte-in a hmanpui.
Malsawmzuala Ralte chuan, hlawhtling turin tumruh leh taimâk a ngai tih sawiin, "Cooperative society hmanga hlawhtling tur pawhin mi aia tumruh leh taima nih a ngai. Mizoramah thiamna sang nei kan pung a, hna thawh tur erawh a vang si a, chuvangin MYC pawhin India ram chhung leh ram pawnah Mizo ṭhalaite thawh ve theih tur kawng a dap mek a ni," a ti.
Mahni inhaiven a pawimawh thu sawiin MYC Chairman chuan, "Sorkar hna kan ngaisang lutuk hi a ṭha ber lo a, sorkar hna ni lo din chhuahna tur a tam a, chu lam chu ṭhalaite'n kan bawh a ngai. Hlawhtling tur erawh chuan kan tumah kan chian a, taimakna leh teirei peihna kan neih a pawimawh," a ti a; hlawhtling tak tak turin mahni kuta innghah a pawimawh thu a sawi.
Symposium hi LDCU president K Darlawma'n a kaihruai a; Cooperative Societies additional registrar Robuanga leh Mizoram Cooperative Apex Bank chairman Lalnunsanga ten cooperative society hmasawnna tur leh ram tana an thawh dante an sawi. Mithiamte'n thupui hrang hrang an sawi a, zawhna leh chhanna hun hman a ni.
MYC CHAIRMAN-IN ENG NGE A SAWI
▶ MYC chuan Japan nen disaster managemnent leh photography lamah thawhho dan tur a ruahman mek.
▶ British Army-ah Mizo ṭhalai 30 vel an awm mek a, tunah hian British Army-a ṭang duh ṭhalai 100 chuangin dilna an thehlut tawh.
▶ MYC-in National Skill Development Corporation, Gurgaon a dawr mek a, anni kaltlang hian Mizo ṭhalaite tan Japan-ah hna a thawh theih dawn.
▶ India rama hotel lâr tak taka thawh nghal theihna tur hotel management zirna September 2024 aṭangin kalpui tum a ni.
▶ Taiwan-a Chinese ṭawng zir turin Lunglei ṭhalai mi pahnih thlan a ni tawh a, an zir zawh hunah Mizo ṭhalaite tan ṭawng zirna buatsaih a ni ang.
▶ Mizo ṭhalaite'n Indigo-ah cabin crew hna an thawh theih nan hmalak mek a ni.