MNF sorkarin kuhva tawlh rûkah mit an siai kha mipuiin an la theihnghilh lo - ZPM Ṭhalai

ZPM Ṭhalai chuan thuchhuah siamin, MNF ṭhalai - Mizo National Youth Front hruaitute'n MZP president hlui hoa tun hnaia Vairengtea kuhva ip 2,000 dahna an tlawh chu lawmawm an tih thu leh, MNF sorkarin kuhva tawlh rûkah mit an siai ṭhin chu mipuiin an la theihnghilh loh thu an tarlang.

ZPM Ṭhalai chuan, MNF sorkar laia kuhva phurh rûkna atana kuhva tawlhte'n khaw karkawng hmun hrang hranga an sialte chu MNYF-in an duh phawt chuan ZPM ṭhalaite'n an tlawhpui thei reng tih an tarlang a; "MNF ministry-ah Home Minister meuhin Mizoram Legislative Assembly session-ah kuhva tawlh rûkna atan GST phuahchawp an siam thu leh kuhva tawlh rûknaah MNF Ministry-in an mit an siai thu a sawite kha mipuiin an la theihnghilh lo," an ti.

Kuhva tawlh rûk chungchang CBI-in an chhui tur chu lawmawm an tih thu sawiin ZPM Ṭhalai chuan, "Mahni ngûm khâk hmu lo a, rem leh rem lo pawh thlu loa ram leh hnam leh a chhunga cheng mipui hmangaih der thut ṭhin 'politics ball chhia' hi mipuite'n i thliar hrang thiam zel ang u," an ti bawk.