Assam hmalakna titawp turin sorkar phût

MNF Serlui North Block chuan thuchhuah siamin, Assam lamin Vairengte Sabual velah kawng an lai thar nasa hle niin an tarlang a, Assam hmalakna chu titawp turin Mizoram sorkar an phût.

Serlui North Block MNF chuan, July 20, 2024 khan Vairengte Aitlanga Mizo kut hnathawktute harsatna leh Mizoram police duty-te an tlawh tih an sawi a, "Assam lam hian an police-te awlsam leh nuam zawka an inkalpawh zung zung theihna turin Vairengte Sabual muala Pu Phirthanga leilet an laih leh Pu J Samuela huanah JCB/Hitachi hmangin kawng an rawn lai thar nasa hle tih hmuhchhuah a ni," an ti.

Home Minister-in July 29, 2024 khan thuthar thehdarhtute hmaah, ZPM sorkar hnuah ramriah status quo bawhchhiatna thar a la awm lo nia an hriat thu a sawi chu pawi an tih thu sawiin Selui MNF chuan, "Vairengte mipui kan rilru a na hle. 29.7.2024-ah pawh Assam sorkarin Vairengte Aitlangah kawng an la lai reng a ni," an ti a; Assam-in kawng an lai tih chu Home Minister-in a hre lo em ni tih chu an zawhna a nih thu an tarlang.

MNF Serlui North Block chuan, ramri venhimna thuam chaka a rang lama hma la tur leh Assam sorkarin status quo chhunga hma an lakna tihtawptir nghal turin Mizoram sorkar an ngen a; huaisen taka ramri humhalha hma la turin an ngen bawk.