KHAWTHLIR

BSF-in teak man

Border Security Force (BSF) chuan July 29, Thawhṭanni khan an thu dawn bawhzuiin India leh Bangladesh inrìna Khawthlang Tuipuiah teak tum 164 an man. BSF-in teak tum 164 an man chu cheng nuai 2.84 hûa chhût a ni a, Tlabunga Environment, Forest & Climate Change department hotute hnenah an hlan a ni.

Lehkhabu 700 pe

Mizoram Sustainable Development Foundation chuan YMA branch hrang hrang library-a dah turin nimin khan Central YMA hruaitute hnenah 'Tui kan nunna' tih lehkhabu bu 700 an hlan. Lehkhabuah hian Mizorama tui dinhmun chungchang mithiamte thuziak dah a ni.

VLT vuah turin ti

Siaha District Transport Officer chuan Siaha district-a passenger phur lirtheite chu September 22, 2024 ral hmaa Vehicle Location Tracking (VLT) device vuah vek turin a hriattir. VLT vuah lote chu DTO-ah re-register, permit pek leh renew bakah, fitness certificate pek theih a nih dawn loh thu tarlan a ni.

Minister-in kâwm

Social Welfare & Tribal Affairs, Women & Child Development minister Lalrinpuii chuan nimin khan a pisaah Mizoram State Council for Child Welfare member-te a kâwm a; June 24-29, 2024 chhunga Chandigarh-a 39th Learn to Live Together Camp-a tel Saihnuni Sailo Memorial School zirlai paruk leh an hruaitu mi pahnih a kâwm bawk a, naupangte hnenah thilpek a hlan.

CSC tan training

Saitual district-a common service centre (CSC) enkawltute tan nimin khan DC conference room-ah e-district training neih a ni a, bawrhsap Dr Lalngura Tlau-in a telpui. Training hi vawiinah chhunzawma zawh a ni ang. Saitual district-ah hian khaw 40-ah village council 44 awmin, CSC 36 a awm tawh a; Lailak, Dilkhan, Changzawl leh Chiahpui-ahte CSC a la awm lo tih tarlan a ni.